YẸWHEHÓ OMẸ WINYANWINYAN LẸ TỌN

(MESSAGE TO THE YOUTH)

He yín didọ to azán fọtọ̀ntọ owhèsùn ṣinẹnẹtọ,
owhè fọtọ́n-fẹnẹ-kẹ̀nnẹ-aotọ (1970) tọn mẹ to Klefẹdi,
gbọn nọvisunnu Ewald Frank dali

1 TẸSALONIKA 4:1-8

Humọ míwlẹ to mì vẹ, mẹmẹsunnu, bo sọ to tùdohomẹna mì to Jesu Oklunọ mẹ dọ dile mì ko kẹalọyí to mí de, le mì do nọ zinzọnlin do, podọ nado wà onú he jlo Jiwheyẹwhe, mọwẹ mì ni to susudeji gege. Na mì yọ́n aṣẹ he hunkọ mí yí na mì lẹ gbọn Jesu Oklunọ mẹ. Na ehe wẹ ojlo Jiwheyẹwhe tọn, yèdọ jijọwiwé mìtọn, dọ mì dapana ogalilọ: na omẹ dopodopo to mì mẹ nido yọ́n le é na zán onú zinzán etọn do to jijọwiwe po yẹyi po mẹ… (Darby)

YẸWHEHÓ OMẸ WINYANWINYAN LẸ TỌN

To otẹn ehe mẹ, kẹdẹdilé mí ko nọ dọ do to  whelẹponu,  dọ, onú  devo de ma dóna yín didọ adavo Ohó Jiwheyẹwhe tọn kẹdẹ. Omẹ dopodopo tindo jlọjẹ nado dindona ede gbọn hinhọ́n Ohó Jiwheyẹwhe tọn tọn dali. E ma yín nado dókàndeji do yisenọ de go gba adavo do Owé Wiwé lẹ lọ go. E yín mí jlo nado to nukọnyì to Jiwheyẹwhe nukọn, mí dóna gbọ̀ na Ohó Jiwhweyẹwhe tọn kẹdẹ ni plán mí. Yèdọ patakli, to asiko he mẹ mí tin te he, to dandanmẹ nado nọ̀ Jiwheyẹwhe mẹ. Enẹ lọ bọawu nado tin to Ohó Jiwheyẹwhe tọn mẹ. Ewọ he tọ́njẹgbonu sọn Ohó Etọn mẹ, ma tin to Ewọ mẹ gba, mí tindo kàndeji to whelẹponu nado nọ sè dọ Ohó Jiwheyẹwhe tọn wẹ kàndeji nugbo lọ, podọ dẹnsọlé mí tindo kànṣiṣa po Ohó lọ po whenẹnu wẹ mí tin po Jiwheyẹwhe po. Ewọ he ma tindo kànṣiṣa po Ohó Jiwheyẹwhe tọn po, ma tlẹ sọgan tin po Jiwheyẹwhe po gbede. Ehe lọ to didóhia dọ ohókànbiọ ma sọ tin to mẹpope de ba.

To whejai he, mí mágbè nado dọhó nugbonugbo hlan jọunjọja mítọn lẹ. Enẹwutu núdelẹ tin he yè didóai di núplọ́nmẹ de, podọ mí omẹpó sọ yí yé sè, podọ mí omẹpó sọ kẹalọyí yé, podọ mí sọ yise nugbonugbo dọ jọunjọja lẹ ma dóna gbẹkọ sọn enẹ lọ go gba, ṣigba yè dóna gọalọna yè dogbọn hókànbiọ vivẹ ogbẹ̀ lọ tọn tọn dali, mí sọ yise dọ alọgọ nẹ lọ na sọn Jiwheyẹwhe de wá, eyín yé jò yéde bo yín pinplán gbọn Ohó Jiwheyẹwhe tọn dali. Tofi, ohó de tin to Owé PSALM 119:7 tọn mẹ. Mí na hẹnsọn afọ ṣinawetọ lọ.

Yẹn na nọ yí tenọgligli ayiha tọn do na opẹ́ hlan we, whenuena yẹn plọ́n whẹ̀dida dódónọ towe lẹ. Yẹn nọ payi osẹ́ndoai towe lẹ go:A gbẹ́ mi dai gbidigbidi blo. Etẹ yọpọsunnu de nado klọ́ aliho etọn ? gbọn awuhihọ hlan ẹn dali kẹdẹdi ohó towe. Ayiha lẹpo pete wẹ yẹn do to dindin we: Adike yẹn dánbu sọn gbèdide towe mẹ blo. Ayiha ṣie mẹ wẹ yẹn yí ohó towe whlá do, na yẹn nikã wàylan do we. Donanọ wẹ hiẹ, Oklunọ; Plọ́n osẹ́ndoai towe lẹ mi. Onùflo ṣie wẹ yẹn do la whẹ̀dida onù towe mẹ tọn lẹpo. Yẹn ko to ayajẹ to aliho aṣẹdai towe lẹ tọn ji, dile é te to adọkun lẹpo mẹ. Yẹn na nọ to ayihamẹlẹnpọ́n to ogbèdai towe lẹ mẹ, bo sọ nọ dayi aliho towe lẹpo go. Yẹn na nọ na homẹhùnhùn dẽ to osẹ́ndoai towe lẹ mẹ. Yẹn ma na wọnji ohó towe go gba.

Ohó vivẹ lọ wẹ yín afọ ṣinẹnẹtọ lọ (9) ‹‹ Etẹ yọpọsunnu de nado klọ́ aliho etọn ?›› Gblọ́ndo lọ wẹ yín dọ, ‹‹ gbọn awuhihọ hlan ẹn dali kẹdẹdi ohó towe. ››  Dogbọn whẹjijọ ohókànbiọ he yè ko hẹnwá ofi to nọvisunnu lẹ ṣẹnṣẹn to ojlẹ godo tọn he mẹ, yẹn tindo to ayiha ṣie mẹ nado dọhó onú he sọgbè de tọn hlan yisenọ de, dogbọn aliho he mẹ mí sọgan mọdona lé mí dóna kavi lé mí na nọ basi onú lẹpo do to osi de mẹ. Bé mì mọdona ? Na yẹn lọsu tọn ayiha ṣie to zoji, na e ma bọawu nado dọhó gba, to whenuena omẹ nẹlẹ pó ko tin to aisinsin tofi, mẹhe sọgan dáwhẹ̀ húgán yẹn. Ṣigba to núyọ́nẹn dagbe ayiha ṣie tọn tọn mẹ, mí jlo nado hia onú delẹ jẹ to Owé Wiwé lẹ mẹ. E ma yín nado hẹn whẹ̀didá wá gba, kavi nado dlẹnalọdó, adavo nado gọalọna, na mí nido pégó nado dọ́n núplọ́nmẹ de jẹgbonu. Podọ yẹn yise dọ, mí mẹhe ko tin to gbẹ̀ to asu po asi po yínyínmẹ lẹ, ko mọdona dọ gbèmímá titegbè vivẹ awe wẹ tin ehe kàn ogbẹ̀ mítọn: Tintan wẹ yín, gbèmímá mítọn hlan Jesu Klisti yèdọ gbèmímá he kọ̀n mí dopọ po É po, e ma yín hlan ojlẹ de poun gba, ṣigba yèdọ kakadoi. Gbèmímá awetọ wẹ yín, omẹ awe he tindo kànṣiṣa na ogbẹ̀ ninọ̀ yetọn lẹ; gbèmímá lọ nọ yín bibasi sọn omẹde ji do jẹ omẹ awetọ ji.

Nado gbawhàn tukla lọ tọn, mì gbọ na ehe ni yín núvivẹ de na omẹ lẹpo he jlo nado basi gbèmímá awetọ he, mì gbọ ni yín bibasi to odẹ̀ mẹ, to godo he é lẹnnú do e ji dagbedagbe, to kàndeji lẹpo mẹ matin mayise depope. Ewọ he na biọ núwiwà he mẹ po mayise po, basi núṣiwà daho de hlan ogbẹ̀ ede tọn. Omẹ lọ whenuena é mọ yí gbèmímá etọn, enẹgodo ewọ sọ ṣẹ adusi po amiọn po pọ́n hlan, kavi mọ whanpẹnọ de, bo sọ ṣẹ kọ̀lẹ́pé hlan fi podọ hlan dọ́n nado pọ́n , podọ nado zé ode jlẹdó ode go, podọ to vivọnu nado sọ vọ́ núlẹnpọ́n, dọ omẹ he lọ ma kó wá whinwhẹn mẹ nado bẹ́ gbeji zọnlin asu po asi po tọn gba. Bé e ma yín whenuena mí tindo kàndeji pipé nugbo lọ, matin gbèdido gbonu tọn, na enẹ wẹ awetọ lọ; ṣigba dogbọn kàndeji nugbo lọ he Jiwheyẹwhe kẹdẹ sọgan zé do ayiha mẹ na omẹ, na finẹ lọ kẹdẹ wẹ mì dójlọjẹ nado pé hẹ tukla he nọ pannukọn omẹ to aihọn mẹ mahànú, podọ to whenẹnu, kẹdẹdilé mí to sisè to kọ̀ndopọ́ mẹ, mí sọgan dọ, dọ, mí na zọ̀npọ́ “kaka jẹ opòdo aihọn tọn”.

To azán nẹlẹ mẹ, mí yín pinplán sọmọ bọ, núhe yè dóna dohia bo sọ yín hinhẹnṣẹ̀ kẹdẹdi Biblu, enẹ lọ dóna yín zizédo titò mẹ kẹdẹdi Biblu. Enẹwutu, ohókànbiọ hlan omẹ winyanwinyan mítọn lẹ wẹ yín dọ, nawẹ onú helẹ dóna yín zinzándó to ahọludu Jiwheyẹwhe tọn mẹ? Do ayi e go, yẹn jlo dọ mì ni yọ́nẹn dọ, yẹn ma to owhẹ̀gbledo omẹ depope gba, dọ, eyín yẹn dègbè dinvie dọ, devizọ́nwàtọ Jiwheyẹwhe tọn de kavi yẹwhehódọtọ togùn he ma to mẹdeglọ́ tọn de, matin to finẹ poun nado dègbè dona tọn kẹdẹ gba, ehe lọ sọ tin hlan agùn mẹho lẹ ga, ṣigba yé sọ tin to finẹ nado nọ ná ohónámẹ lẹ omẹ to ojlẹ he mẹ gbèmimá de wá sọawúhia to omẹ awe ṣẹnṣẹn. Do ayi e go, e ma sọgbe nado to didọ, dọ, ojlẹ na wá bọ mí na wá kẹnù do ohó lẹ lọ go gba, to mọ wiwà mẹ, yé na to owhẹ̀jijọ alọpa delẹ ná, yèdọ ehe ma hẹn omẹ nado tindo kándeji pipé to Jiwheyẹwhe de, dọ, núhe yè ko dọ to nukọn to ofi to azán alọwiwlé tọn gbè, sọgan yín didọ nuogbnugbo to Jiwheyẹwhe nukọn. Podọ eyín to otẹn he mẹ to ofi, kavi to ofi devo lẹ, na yè wlán dọ: “na gbẹde depope ni ma klán núhe Jiwheyẹwhe kọ̀ndopọ́ blo”, enẹ lọ to didohia to ninọ̀mẹ de mẹ dọ, mẹhe dègbè ohó nẹlẹ tọn ko mọ dọ, Jiwheyẹwhe de wẹ kọ̀ndopọ́ he lọ sọn. Ṣigba eyín e wá jọ̀ to alọ de mẹ kavi to devo mẹ, whenẹnu yè sọgan dọhó nẹlẹ, na enẹ lọ dóna yín didọ. Ṣigba e ma dóna yín mọ to whepoponu gba.

Na mí tin nado yí linlẹn mítọn do dègbè núdepope tọn to otẹn he mẹ to awubibọ mẹ. Ṣigba núhe mí to didọ to ofi, mí na wá whèdọ to Jiwheyẹwhe de, to kàndeji de mẹ dọ, mọwẹ. Yẹn ma to ehe dọ to dinvie, na mí jlo enẹ lọ na omẹ de gba, kavi mí to núde zé whlá gba. Ṣigba to vlẹkẹsi de mẹ, e tin to ayiha ṣie mẹ ma na do dọhó do onú he ko jọ̀ wáyì lẹ go gba, ṣigba do ehe na wá jọ̀ lẹ go, nado táhinhọ́n do ninọ̀mẹ he jẹ na ovi Jiwheyẹwhe tọn lẹ tọn ji whladopo.

Do ayi e go, mí mọdona lé onú lẹ te to aihọn mẹ. Ṣigba mí ma yín aihọn he tọn gba, kẹdẹdilé mí nọ hia ẹ dó to Owé JOHANU 17 tọn mẹ. Na Oklunọ Jesu dọmọ: “Yé ma yín aihọn tọn gba, dilé yẹn ma yín aihọn tọn dó”. Podọ na mí wá ohóta he ji wutu: Mì yọ́nẹn dọ owéfọ delẹ dọhó do e ji, mọwẹ e ko sọ te sọn whẹ́whẹ́nu aihọn tọn, dọ, Jiwheyẹwhe ko kọ̀n mẹhe jẹ hẹ yénọzo lẹ dopọ́, yèdọ ode hlan awetọ. Mí sọ yọ́nẹn hézéhézé dọ mẹhòba po awufiẹsa po tin to ninọ̀mẹ he lọ mẹ to sunnu lẹ mẹ. Podọ whenuena yè basi didè he ma sọgbè, yè sọgan dọ̀n awufiẹsa susu do ogo, yèdọ ehe mẹdepope ma sọgan vọ́jlado gba. Enẹwutu, yẹn jlo nado hia ohó he tin to Owé 1 TẸSALONIKA 4:1 tọn do ohóta he lọ ji, dọmọ:

“Humọ míwlẹ to mì vẹ̀, mẹmẹsunnu, bo sọ to tùdohomẹna mì to Jesu Oklunọ mẹ, dọ dilé mì ko kẹalọyí to mí de, lé mì do nọ zinzọnlin dó, podọ nado nọ wà onú he jlo Jiwheyẹwhe, mọwẹ mì ni to susudeji gege. Na mì yọ́n aṣẹ he hunkọ mí yí na mì lẹ gbọn Jesu Oklunọ mẹ. Na ehe wẹ ojlo Jiwheyẹwhe tọn, yèdọ jijọwiwé mìtọn, dọ mì ni dápana ogàlilọ; na dopodopo to mì mẹ nido yọ́n lé é do nọ zán onú zinzán etọn dó to jijọwiwé po yẹyi po mẹ; e ma yín to wantúntún mẹ gba, yèdọ di Kosi he ma yọ́n Jiwheyẹwhe lẹ: mẹdepope wà ylando blo, é sọ klọ mẹmẹsunnu etọn to núdepope mẹ blo: na Oklunọ wẹ ahọ́súyitọ to onú helẹ ji wutu, dilé mí dọ na mì jẹnukọn, bo sọ to kuundèna ga. Na Jiwheyẹwhe ma ylọ mí do mawé kọ̀n gba, adavo do jijọwiwé mẹ. Enẹwutu, mẹdepope he to omẹ vlẹko, é ma to gbẹtọ vlẹko gba, adavo Jiwheyẹwhe mẹhe yí Gbigbọ Wiwé etọn na mí ga”.

(Biblu Janman tọn dọ to afọ 4 lọ dọmọ: “na dopodopo mìtọn ni yọ́n lé é na nọ zán hẹ asì etọn dó to jijọwiwé mẹ…”.

Do ayi e go, mí omẹ pó jlo nado hẹn homẹ Jiwheyẹwhe tọn hùn to onú popo mẹ, kẹdẹdilé mí ko dọ dó jẹnukọn, po oyọ́nẹn mítọn po podọ po linlẹn mítọn lẹ po ga. Podọ yẹn sọ to didọ whladopo dogọ́, dọ, mí ma sọgan súsú ojlẹ he wáyì lẹ gba, ṣigba mí sọgan gọ́alọna mídelẹ bo sọ gọ̀ ojlẹ he já lẹ do alọ Jiwheyẹwhe tọn mẹ po yise po, sọmọ bọ whẹpo dẹpẹ winyanwinyan de nado dè linlẹn he sọgan yín alọkẹyí de tọ́n, na ewọ ni hodẹ̀na ojlẹ susu whẹpo é nido dọhó, na whenuena ewọ na dọhó, omẹ he wutu ewọ do dọhó ma nado tin to wuwlu mẹ gba, podọ ewọ ni yọ́nẹn dọ enẹ lọ ma yín ayinhunnú de gba, ṣigba onú titegbe de wẹ enẹ lọ yín. Yẹn ma yise dọ, dẹpẹ winyanwinyan de sọgan magbè nado to ohọ̀n susu húhú gba, ṣigba adavo na ewọ ni mọdona dọ, whẹpo ewọ nado húhú ohọ̀n de, yèdọ yè dóna hùn hlan ẹn. Mọwẹ e bọawu dó nado basi, podọ Jiwheyẹwhe dóna ná mí jọmiọn nẹ lọ. Jẹnukọn, yẹn lọsu tindo, (podọ enẹ lọ sọgan sọawúhia di mẹṣanko to dinvie) ṣigba yẹn dọhó hlan otọ́ ṣie lọsu to whenuena ojlẹ lọ wá, yẹn dọhó po é po bo sọ kànhóbiọ ẹ. Mì sọgan dọ, dọmọ, ‹‹Bé nugbo wẹ, Nọvisunnu Frank è, bé enẹ lọ to dandanmẹ wẹ ?›› Na yẹn tọn, mọwẹ, podọ hlan mí mẹ pó he tindo sisi na mẹjitọ mítọn lẹ. Podọ Biblu sọ dọ enẹ lọ na ohia ojlẹ godomẹ tọn, dọ, ovi lẹ na yín tólivẹtọ na mẹjitọ yetọn lẹ. Ṣigba yín mí tindo ovi yisenọ lẹ, whenẹnu mí sọgan biọ sọn yé de dọ yé ni yín tónusètọ to onú lẹpo mẹ, podọ Jiwwheyẹwhe Lọsu sọ tindo jlọjẹ nado yí yé na mí. Podọ mẹjitọ lẹ ni din onú dagbe na ovi yetọn lẹ, podọ whenẹnu, whenuena ojlẹ whinwhẹn pipé lọ wá na ovisunnu dẹpẹ de, e ma yín sọn owhè fọtọn kavi fọtọnnukundopo gba, ṣigba yedọ húgan mọ, kakajẹ whenuena ewọ ko mọ dọ, é tindo kàndeji pipé bo ma jlo nado nọ̀gbẹ̀ na ede kẹdẹ gba- podọ tofi yẹn jlo nado dọ gbaungba whladopo dogọ, dọ, na mí he yín yisenọ lẹ tọn, todido nado vọ́ asi dà yín onú he nọ hẹn ayiha yín awutunọ, enẹ lọ yín winwlán to Owé HOWHINWHẸN tọn lẹ mẹ, (HOWHINWHẸN 13:12) ovi sunnu dẹpẹ de dóna yín whinwhẹn to jọunjọjayínyín etọn mẹ to owhè lẹ mẹ po onú devo devo lẹ po yèdọ to linlẹn helẹ mẹ. Adavo dọ, azán lọ ni wá bọ yé na wa mọdona onú lọ podọ nado lẹnpọ́n. Yín e ma yín mọ, ewlọsu na zé ede biọ tukla sinsinẹn de mẹ to oklé po ozán po, bo nasọ de onú ylankan lẹ po avùn lẹ po, bo ma na yọ́n lé é na basi linlẹn etọn lẹ do ba, podọ yọnnu lọ (linlẹn lọ) na yín wuwlu, na é nọ nọ̀gbẹ̀ to oyọ́nẹn etọn podọ to madoyọ́nẹn etọn mẹ gbọn linlẹn etọn lẹ dali. Enẹwutu yè nọ tin to jinjanmẹ po linlẹn helẹ po to whenuena ojlẹ lọ wá, enẹ lọ sọ tin na nọvisunnu lẹ e ma yín hlan nọviyọnnu lẹ gba. Na nọviyọnnu lẹ ma dóna yín jinjan na linlẹn helẹ gba, ṣigba ewọ dóna nọte kakajẹ whenuena omẹ de na wá biọ alọ etọn. Podọ whenẹnu, ojlẹ de nasọ wá bọ ayiha etọn na tin to tukla mẹ. Owhẹjijọ tẹwutu wẹ mí dóna yí onú helẹ di aliho de to aihọn mẹ, nado zé dewe lọsu do tukla sinsinẹn mẹ to zẹdẹ de glọ, yèdọ to oglọ agbànpinpẹn he yè ma pégo nado tùn mẹde dote sọn e mẹ, po ohókànbiọ ma do alọ te he po: dọmọ, ‹‹Nawẹ e bọawu dó?›› Ṣigba yín yé wá ganpipémẹ, whenẹnu wẹ yé na tin to gbèsisọmẹ nado dóakọnna tukla he to e mẹ lẹpo.

Do ayi e go, nọvisunnu lẹ tin to finẹ to ohó lọ didọ whenu, whenuena nọvisunnu amẹlikanu lẹ podọ omẹ delẹ po tin to ofi he dlẹnalọdo ohó he nọvisunnu Branham dọ dogbọn ohóta he lọ tọn dali. Ewọ sọ dọ to finẹ lọ dọ, (yẹn lẹn dọ yẹn ma sọgan dọ núhe yè sọgan dọ lẹpo gba, na whladopo gẽ wẹ yẹn na dọ ẹ hlan jọunjọja lẹ). Ṣigba pagbe he ovisunnu dẹpẹ yisenọ de tindo ma yín núhe mẹde sọgan dopa etọn to egbé bo nasọ diọ ẹ to osọ gba. Do ayi e go, to ninọ̀mẹ lẹpo mẹ, “mọwẹ” mítọn dóna yín “mọwẹ”. Podọ whẹpo mẹdepope nado dọ “mọwẹ” mọhunkọ tọn, e jẹ dọ kándeji lọ ni tin to finẹ. Podọ yè ma sọgan yígbè etọn jẹnukọn, adavo eyín yè ko dọhó etọn hẹ mẹjitọ́ lẹ whẹ́…

Whẹpo yè nado dọ ẹ hlan agùnmẹho agùn lọ tọn lẹ, kándèji lọ dóna ko tin to ayiha mìtọn mẹ dote. Do ayi e go, ehe lọ ma sọgan sọawúhia adavo yè hodẹ̀ vivẹvivẹ sọmọ bọ ehe lọ na wá lẹzùn núvivẹ de podọ magbọjẹ de hlan omẹ lọ, bọ ewọ nasọ yọ́nẹn dọ, ojlẹ lọ ko sọ, bọ mì na wá mọ dọ mì ko mọ mẹhe to linlẹn po kándeji de po, dọ, yẹn na nọ̀ hẹ omẹ he lọ, whenẹnu wẹ mì na tindo kándeji gbigbọ tọn de to mì mẹ, to lẹ́do mìtọn podọ mẹhe e kàn lọ. Enẹ lọ ma yín tẹnpọ́n de gba, kavi avididla gba, kavi whinwhan de gba, ṣigba kọ̀ndopọ́ he sọn Jiwheyẹwhe de wẹ. Whenẹnu wẹ, yè sọgan dọ po kándeji pipé depo dọmọ, “Na mì dike mẹdepope klán núhe Jiwheyẹwhe kọ̀ndopọ́ blo.” Mọwẹ na mẹhe na jlo nado klán yé, ma sọgbè gba, yín eyín dọ Jiwheyẹwhe wẹ kọ̀n yé dopọ́. Enẹwutu, nado gbawhàn tukla lẹ tọn, mí dóna nọ̀ mọ ga. Nado dọ titegbe dọ, gbèmimá he mẹde ma sọgan má to egbé bo nasọ gbẹ́ ẹ to osọ gba, ṣigba alẹ̀nù de wẹ kẹdẹdilé yẹn ko dọ dó dai.

Do ayi e go, gbèmimá titegbe awe delẹ wẹ tin to taji. Tintan wẹ yín gbèmimá de hlan Jesu Klisti, na mí na tin po Ewọ po to Madopòdo mẹ wutu. Ṣigba gbèmimá awetọ he yín onú họakuẹ gbẹ̀zán kọ̀ndopọ́ tọn tọn, gbèmimá de wẹ podọ didè de he mẹde basi na omẹ he na wá nọ̀ hẹ. Do ayi e go, to gbèmimá helẹ mẹ vò, devo depope matin to aihọn mẹ ehe sọgan pẹnzín na gbẹtọ nado hẹn wá odẹ̀ mẹ, po ovẹvivẹ po, po vivẹnu dido po to Jiwheyẹwhe nukọn. Do ayi e go, yè sọgan diọ gbèmimá devo depope he jẹagọ̀do ehelẹ. Eyín yẹn mágbè nado họ̀ mọto to egbé, yẹn sọgan mágbè nado họ̀ devo to osọ. Na gbèmimá dopodopo he yè mágbè etọn sọgan yín hinhẹngble kavi yín didiọ, yín e tlẹ yín dọ, akuẹhó wẹ kavi lala, ṣigba yè sọgan wà ẹ. Ṣigba gbèmimá hlan Jesu Klisti, yèdọ ehe yín bibasi to Jiwheyẹwhe nukọn, podọ po Jiwheyẹwhe po , enẹ lọ tin to ote kakadoi. Na yè wlánwé etọn  dọ, “Yẹn bo nasọ dà we hlan dẽ kakadoi: mọwẹ, yẹn na dà we hlan dẽ to dódó mẹ, podọ to whẹdida mẹ, po to dagbewanyin mẹ, podọ to lẹblanu mẹ” (HOSEA 2:19-20). Enẹ wẹ núhe Jiuwheyẹwhe ko dọ hlan omẹ Etọn lẹ. 

Onú devo he bọdoego wẹ yín dọ: Etẹwẹ onú he jẹ na omẹ winyanwinyan lẹ, to whenuena yé sọawúhia nado sè Ohó Jiwheyẹwhe tọn, podọ whenuena yé tọ́njẹgbonu sọn sinsẹ̀nhọ̀ lọ mẹ? Mí yín finfinyọn bọ e ma yín sọn aga kẹdẹ gba, ṣigba sọn amiyọn mẹ, sọn adusi mẹ podọ sọn ofi popo. To okle whenu, whenuena nọvisunnu lẹ tin to ofi, yẹn dóakọnna ohó he yè dọ hlan mi lẹ tọn, dọ, jọunjọja fọtọ̀n-nukun-ẹnẹ sọn mí mẹ, mí nado dọ e ma yín sọn ofi gba, yè hẹn yédelẹ do ninọ̀mẹ he ma sọgbe de mẹ, yèdọ kaka jẹ otẹn he mẹ ga. Whenẹnu e ma bọawúna mí lala, mì mẹvivẹ mítọn jọunjọja lẹ emi, mì tùnwun núhe mí to didọ hlan mì go. Na mì wẹ whẹndo he Jiwheyẹwhe ko ylọ ga, bo sọ yinwanna di míwlẹ, kavi di ehe ja tọn. Ṣigba to owhé Jiwheyẹwhe tọn gbè, e jẹ dọ, sisi po budisi po ni dùahọlu to Jiwheyẹwhe nukọn podọ to Ohó Etọn nukọn, podọ hẹ núhe tin to kọ̀ndopọ́ mẹ hẹ Ohó lọ lẹpo po. To sinsẹ̀n godo, yè ma sọgan tọ́n jẹ alihotó nado to ohógbè nulunọ lẹ tọn zán ode hlan awetọ gba, kavi zán ninọ̀mẹ he hunkọ tọn lẹ gba. Enẹ lọ ma jẹ gba. Do ayi e go, whenuena mì mọ gbẹtọ lẹ tọ́njẹgbonu sọn sinsẹ̀nhọ̀ mẹ, bo ma hẹn gbèdido de tọ́n jẹgbonu gba, bọ yé sọ tọ́njẹgbonu to abọẹninọ de mẹ, na yé ko kẹalọyí ohó lọ, bo zé e do yédelẹ mẹ nado to linlẹn ẹn pọ́n, enẹ lọ yín tónumase po yẹyi madó po nado mọ dọ, núhe ma sọgbe lẹ yín didètọ́n jẹgbonu to otẹn he lọ mẹ. Enẹ lọ ma yín alọkẹyí de hlan yisenọ lẹ bo sọ yín vivi de hlan yé he yè na zé yì lẹ gba, he tindo gbọdemẹ nado sẹ̀n Jiwheyẹwhe, podọ nado sọ tin to apáwhé Etọn lẹ. Mì do ayi e go, dọ, ojlẹ po whenu po, podọ otẹn lọ ga tin na onú popo. Ṣigba otẹn he lọ tin nado sè Ohó Jiwheyẹwhe tọn kẹdẹ. Enẹwutu, yè dóna nọ wá finẹ bo nasọ nọ lẹ́gọ̀ matin núkiko gba. Do ayi e go, eyín jọunjọja lẹ tindo ohó de nado dọ to yédelẹ mẹ, whenu whiwhla de tin na enẹ lọ nado yín didọ, eyín enẹ lọ yín núvivẹ de, na yè nido dọhó depope kavi bo sọ wà núdepope. Ṣigba jẹnukọn, mì dóna kànhóbiọ mìnọzo lẹ, dọ: Eyín gbẹtọ lẹ mọ mí, lé mì to tintọ́njẹgbonu dó, (bọ aliho lọ wá lẹzùn otẹn núwledọ tọn de), etẹwẹ omẹ nẹlẹ na lẹn lò? Bé mì lẹn dọ, omẹ nẹlẹ sọgan wá ohọ̀ he mẹ nado wá sè Ohó Jiwheyẹwhe tọn he whladopo dogọ? Lala, na to vlẹkẹsi de mẹ, mí dóna dawhẹ̀na mínọzo lẹ lọsu, bo nasọ ylọ Jiwheyẹwhe po ayiha mítọn lẹpo po na Ewọ nido gọ́alọna mí to ninọ̀mẹ he lọ mẹ.

Ṣogan, mì mọdona hézéhézé dọ: míwlẹ wẹ omẹ godogodo tọn he jlo nado do agbàn pinpẹn na omẹ, yèdọ ehe míwlẹ lọsu ma tlẹ sọgan hẹn gba. Ṣigba yẹn yise dọ, ojlẹ ko wá nugbonugbo (eyín mí yín jọunjọja kavi mẹho) na mí nido payi ma nado gbleawuna mẹde kavi hẹn omẹ depope dahli gba, ṣigba nado yín dona de gbọn ojọmiọn Jiwheyẹwhe tọn tọn mẹ. Podọ whẹjijọ nẹ lọ wutu mí jlo dọ, núhe yè na dọ to ofi to dinvie, ni yín domọna kavi tùntùnmẹ di wọhẹ de, podọ to vlẹkẹsi de mẹ dọ Oklunọ de wẹ ehe sọn wá, yèdọ Mẹhe yinwanna mí bo sọ jlo nado wọhẹ mí.

Do ayi e go, mí tindo jlọjẹ titegbe na jọunjọja nado zán huhlọn yetọn he Jiwheyẹwhe ko ná hlan yé lẹ, ehetọn yín nado jihàn, kavi nado hò ohún to klandowiwé mẹ podọ to wiwé mẹ to Jiwheyẹwhe nukọn. Podọ kẹdẹdilé mí ko dọ dó dote: whenuena ojlẹ enẹ lọ tọn na sọawúhia, whenẹnu wẹ mì ma na yín homẹmahùnnọ gba. Ṣigba ehe lọ yín núhe madó tùnmẹ de na sunnu owhè fọtọ̀n-nukun-dopo (16), kavi fọtọ̀n-nukun-awe (17), kavi fọtọ̀n-nukun-atọ̀n (18) tọn nado gọ́na linlẹn helẹ, enẹ lọ ma ko tindo kándeji de to bibasi mẹ gba. Whenẹnu wẹ gbẹtọ nọ zé ede do awubla daho lẹ mẹ. Bé mẹnu wẹ na wá dè mì sọn yé mẹ? Enẹwutu, mí jlo na zán whenu mítọn lẹ podọ to wiwà mẹ, dẹnsọlé onú he pò lẹ ma ko biọ titò mẹ to linlẹn mẹ gba. To whenẹnu, mí tindo whenu susu nado dọ núhe tin to nukọn na mí lẹ tọn.

Mì sọgan dọ, dọmọ: “Bé mọwẹ e jẹ dọ e ni yín nugbonugbo?” Do ayi e go, omẹ godogodo tọn wẹ yẹn, kẹdẹdilé yè ko dlẹnalọdo dó, nado ná osẹ́ndóai he yè zédai na whèta de tofi, ṣigba yẹn ma sọgan basi jẹagọ̀ gba. Na yẹn ma tindo huhlọn de gba. Etẹwutu wẹ mí nado jẹtukla na onú yaya lẹ whenuena e ma jẹ? Podọ kẹdẹdi linlẹn he ayiha mítọn tin to ogbẹ̀ na, yèdọ ehe agbasa mítọn to pinplán. Na finẹ wẹ tukla lẹpo nọ sọn wá, na enẹ lọ kẹdẹ tọn wutu. E ma yín dọ, omẹ de nọ zán linlẹn etọn lẹ to ninọ̀mẹ dagbe de mẹ wutu gba, kavi nọ zán yé dómọ po huhlọn etọn lẹ po gba, ṣigba ewọ nọ lẹn núhe ma jẹ dọ é ni wà. Enẹ lọ wẹ nọ hẹn ẹn biọ tukla lẹ mẹ. Enẹwutu, Owé Wiwé lẹ do dọ dólé dọmọ. ‹‹Na ehe wẹ ojlo Jiwheyẹwhe tọn, yèdọ jijọwiwé mìtọn, dọ mì ni dapana ogalilọ: na omẹ dopodopo to mì mẹ nido yọ́n le é na zán onú zinzán etọn do to jijọwiwe po yẹyi po mẹ e ma yín to wantúntún mẹ gba, yèdọ di kosi he ma yọ́n Jiwheyẹwhe lẹ›› (1 TẸSALONIKA 4:3-5).

Ohó Jiwheyẹwhe tọn wẹ mí omẹ pó dóna yìdòna, mí ma dóna nọ̀gbẹ̀ to linlẹn helẹ mẹ gba, podọ ma nado dike dọ ojlo nẹlẹ ni to nukọnyì na yé ni do dùgán to mí ji gba. Ṣigba kẹdẹdilé yè wlán enẹ lọ dọ, ‹‹ to jijọwiwe po yẹyi po mẹ›› To nukọn Jiwheyẹwhe Húhlọnnọ tọn. Mọkẹdẹ wẹ dòna po dagbewanyi Jiwheyẹwhe tọn po na tin to gbẹtọ lẹ de mẹhe onú helẹ kàn.

Yè sọ vọ́ ẹ wlán dọ, ‹‹É sọ klọ mẹmẹsunnu etọn to nudepope mẹ blo›› (1 TẸSALONIKA 4:6), na Jiwheyẹwhe na yi ahọsu onú lẹpo tọn. Na mẹdepope ni ma ylanwhẹ to ninọ̀mẹ nẹ mẹ blo. Eyín mì yise kavi mì ma sọ yise, ṣigba ylando titegbè lọ wẹ enẹ. Satani sọgan basi nado jò mí do nado gbọn onú devo lẹ mẹ matin ayijijẹ mítọn? Ṣigba ewọ to tintẹnpọ́n nado hẹn mí jai. Na enẹ lọ tọn dali wẹ ylando po homẹgble Jiwheyẹwhe tọn po do tin to gbẹtọ lẹ pó ji. Podọ enẹ lọ mẹ wẹ whlepọ́n to awúsọhia te, podọ enẹ tọn wutu wẹ Paul, whenuena yè dọ̀n ẹn gbọn Gbigbọ Wiwé mẹ, ko ná pahònámẹhó nẹlẹ. Tintan tọn, ohó lọ wẹ yín dọmọ, “Na ehe wẹ ojlo Jiwheyẹwhe tọn, yèdọ jijọwiwé mìtọn, dọ mì ni dapana ogàlilọ” (1 TẸSALONIKA 4:3); Paul mẹhe yín dindọ̀n gbọn Gbigbọ Wiwé mẹ dègbè enẹ lọ tọn. Ewọ sọ dọ kẹdẹdi mẹhe yọ́n owé, dọmọ: “Na mì yọ́n aṣẹ he hunkọ mí yí na mì lẹ gbọn Jesu Oklunọ mẹ” (1 TẸSALONIKA 4:2). Enẹ lọ tin to Ohó Jiwheyẹwhe tọn mẹ. Na núhe tin to Owé Wiwé mẹ lẹpo wẹ núplọ́nmẹ de na yé he to Jiwheyẹwhe sẹ̀n lẹpo bo sọ yín Etọn lẹpo. Enẹwutu, eyín mí tin po Ohó Jiwheyẹwhe tọn po, dilé mí ko hia dó, whenẹnu onú lẹpo na yín dagbe hlan gbẹ̀zán mítọn.

Do ayi e go, mí ma nọ basi gbèmimá de, na mẹdevo lẹ ko yí na mí wutu gba, ṣigba to ofi, omẹ awe na basi gbèmimá bo nasọ yọ́nẹn dọ, ehe wẹ ali Jiwheyẹwhe tọn hlan mí. Whenẹnu mẹdepope ma sọgan glọ́nalina mí gba. Ṣigba nado tindo kándeji de, dọ, gbèdé e ma na yín núṣiwà de to whenuena yọpọ lẹ do linsinsinyẹn yetọn hia hlan mẹjitọ yetọn lẹ gba. Podọ eyín mí ko nọ dọhó onú alọpãlọpa lẹ tọn po mẹjitọ mítọn lẹ po dote, bé e ma jẹ dọ, mí ni sọ nọ dọhó hlan yé dogbọn gbèmimá he yín onú titegbe gbẹ̀zán mítọn tọn dali? Bé e ma sọ jẹ dọ, mí ni tindo kándeji de to yé he Oklunọ Jiwheyẹwhe zé do mí ji nado nọ dọ yẹwhehó Ohó Etọn tọn hlan mí lẹ mẹ? Do ayi e go, eyín mí jlo nado yín Togùn de, yèdọ Ehe ji dona Jiwheyẹwhe tọn sù te talala, bé whenẹnu onú nẹlẹ lọsu dóna yín zizédo titò mẹ bo nasọ tin to otẹn yetọn lẹ mẹ, na omẹ depope ma nado yín onú ahlidida tọn to núdepope mẹ gba, ṣigba na wanyi pipé ni dùahọlu to mí mẹ. Podọ to aihọn mẹ, e jẹ dọ, mí ni yín ohia de, na mí ni sọ yín pọ́ndego hlan ovi mítọn lẹ, podọ na enẹwutu, Jiwheyẹwhe na ná mí jọmiọn Etọn susugege.

To vivọnu, yè wlánwé etọn dọ: “Na Jiwheyẹwhe ma ylọ mí do mawé kọ̀n gba, adavo do jijọwiwé mẹ” (1 TẸSALONIKA 4:7). É sọ to nukọnyì to onú winwlán etọn mẹ, dọmọ: “Enẹwutu, mẹdepope he to omẹ vlẹko, é ma to gbẹtọ vlẹko gba, adavo Jiwheyẹwhe mẹhe yí Gbigbọ Wiwé etọn na mí ga” (1 TẸSALONIKA 4:8). Paul sọ wlán ohógbè delẹ dogọ́ dogbọn ohóta he lọ tọn dali to Owé 1 KỌLINTINU 7 tọn mẹ. Mì omẹ pó wẹ mọdona owé he lọ. Yẹn ma jlo nado dẹn to owéfọ he lọ ji gba. Ṣigba yè wlán to Owé 1 KỌLINTINU 7:37 tọn mẹ , dọmọ: “Ṣigba omẹ he nọte gligli to ayiha etọn mẹ, bo ma tindo, mananọmawà, ṣigba bo tindo huhlọn to ojlo etọn titi ji, bo ko sọ mágbè etọn dó mọ to ayiha etọn mẹ dọ é na whla awhli etọn, wẹ wàdagbe”. Mẹhe hia enẹ lọ, na mọ hézéhézé dọ to gbagbla mẹjitọ lẹ po oviyọnnu yetọn lẹ po tọn wẹ, mẹjitọ lẹ tọn wẹ nado mágbè yetọn dọ, eyín yé na yí viyọnnu yetọn na omẹ de kavi lala. Na e ma yín lé míwlẹ nọ lẹn dó to egbé gba, dọ, oviyọnnu lẹ sọgan mágbè núhe yé jlo tọn kavi dilé yé jlo dó, adavo na yéwlẹ nido dotó gbèmimá mẹjitọ yetọn lẹ tọn tọn, bo nasọ whiwhẹ yédelẹ hlan Jiwheyẹwhe po Ohó Etọn po.

Do ayi e go, yè wlánwé to ofi dọ, e sọgan yín dọ yẹn na hia afọ etọn fọtọ̀n-nukun-dopotọ (36) jẹnukọn, ehe dọmọ: “Ṣigba eyín sunnu de lẹn dọ é ko wànú yìndo hlan awhli etọn go, eyín é ko zẹ̀ owhè etọn go, eyín e jẹ ni yín mọ, mì gbọ é ni wà onú he é jlo, é ma wàylando gba…” Dinvie, etẹwẹ oviyọnnu mítọn lẹ na dọ to egbé, eyín mí dọ hlan yé dọ: “mí ko mágbè ma nado ná mì hlan alọwle gba.” To ayitọnhọngbè, yé na zlọn sọn ohọ̀nta aga. Ṣigba etẹwẹ Ohó Jiwheyẹwhe tọn to didọ? Dinvie, mí ko mọ lé mí dẹn do Ohó Jiwheyẹwhe tọn do. Egbé, omẹ winyanwinyan lẹ nọ dọdọ, “míwlẹ tindo oyọ́nẹn hugán omẹ hóhó mítọn lẹ, bọ míwlẹ nasọ yí popolẹpo zán.” To enẹ lọ godo, etẹwẹ nọ wà jọ̀? Tukla alọpãlọpa lẹ nọ sọawúhia. Enẹlẹ depope ma sọ sọgan sọawúhia ba, adavo mí wá dotẹn he mẹ Ohó Oklunọ tọn yín tonusèna. Na to vlẹkẹsi de mẹ, mí ma dóna dọ, dọmọ: “Mọwẹ, na yẹn yise to Ohó Jiwheyẹwhe tọn mẹ podọ to núhe É dọ dogbọn bẹ́yìlọnmẹ tọn dali lẹ mẹ.” Edabla, ṣigba eyín yè gọ̀ mí wá Ohó Jiwheyẹwhe tọn mẹ, (na mí ko nọ sè dogbọn enẹ lọ dali), whenẹnu mí dóna yí Ohó Jiwheyẹwhe tọn dopodopo sè kẹdẹdilé yè wlán ẹn dó. Enẹ lọ godo wẹ dona Jiwheyẹwhe tọn lẹpo na jẹ do mí ji.

Enẹwutu, mì ma dowezùn sọn amiyọn mẹ jẹ adusi mẹ blo, ṣigba mì ni nọte kaka jẹ whenuena ojlẹ lọ na wá na mẹdepope ma nado tindo mọdọ depope do mì go gba. Do ayi e go, yẹn ma to ehe dọ to egbé, nado dọhó poun gba. Na yẹn lọsu tọn, gbọn osi dẽ tọn dali, yẹn ma sọgan dà nọviyọnnu he yè ko dọ̀nsẹpọ́ de to ninọ̀mẹ depope mẹ gba. Enẹwutu, oviyọnnu he to linlẹn na alọwle etọn nado yín donanọ dóna dẹn do nọvisunnu jọunjọja lẹpo, kaka jẹ whenuena ewọ na mọ dọ ojlẹ etọn po asiko etọn po ko wá. Podọ eyín yẹn dọ to nukọn mìtọn to egbé (yẹn jlo nado dọ, dọ, gbẹtọ he tin to aihọn mẹ wẹ mí omẹ pó), dọ, yẹn ma sọgan kẹalọyí asi ṣie yín e ma yín dọ, yẹn wẹ sunnu tintan he donùnùgo nệ, yẹn ma sọgan dà ẹ gba. Dinvie, mì sọgan dọmọ: “bé hiẹ sọgan zé atin lọ yìaga sọmọ?” Yẹn ma mọdona eyín yẹn sọgan zè e yìaga mọ gba. Ṣigba yẹn yọ́n onú dopo, enẹ wẹ yín dọ, sunnu ma sọgan dó osi na asi he ko yì “ofi podọ odọn…” gba, “ofi podọ odọn…” – osi depope ma na tin to finẹ gba. Enẹwutu, na jọunjọja yọnnu dopodopo he jlo nado dà asú he na dó osi hlan ẹn, bo na whlá ẹ, bo ma jlo nújijọ̀ ylankan de, ni ma biọ gbèmimá depope mẹ kaka jẹ whenuena ojlẹ lọ na wá, yèdọ ehe ewọ yọ́nẹn “to Jiwheyẹwhe po gbẹtọ lẹ po nukọn”; kaka jẹ whenuena ewọ na yọ́nẹn, dọ, “to ojlẹ pẹvi de mẹ, yẹn na dà asú!” Yín e ma yín mọ, bé osi sunnu lọ tọn hlan ẹn na bú. Enẹwutu, e nọ dabla do asì susu dọ, asú yetọn lẹ ma sọ tindo osi de hlan yé ba. Ṣigba hlan asì de, oviyọnnu he “ ko tin to ofi whladopo podọ to odọn whladopo” podọ “to odọn”,  - podọ yẹn wẹ omẹ godogodo tọn he na dọhó, yèdọ mẹ godogodo tọn he na dọhó de.

Lala, sunnu he tindo osi mẹde titi tọn podọ hlan Jiwheyẹwhe, dóna lẹnnúpọ́n hézéhézé dọ, ewọ ma na to nukun etọn lẹ́pé nado to pinpọ́n hlan mizọn-mizọn lẹ gba, ṣigba ewọ na basi titò etọn lẹ, yèdọ ode bọdó ode go to gbigbọ mẹ, nado mọdona lé mẹyinwanna etọn vivẹ lẹ te to Oklunọ mẹ. Enọ lẹ wẹ yín pọ́ndego de hlan mi, e ma yín onú devo depope gba. Núyiwà lọ, núplọ́nmẹ lọ, núyọ́nwà lọ, po onú he pò lẹpo po, onú godo tọn wẹ enẹlẹ pó. Na núhe Jiwheyẹwhe wà wẹ dagbe lọ, podọ enẹ lọ wẹ mí dóna pọ́n hlan.

Nọviyọnnu lẹ emi, jọunjọja yọnnu lẹ emi, mì ma yí whenu mìtọn lẹ nado to asú de din blo! Na onú he ylan taun de bo sọ sọgan gọ̀ gbẹtọ do godo de wẹ na oviyọnnu de nado wà enẹ lọ. Ṣigba whenuena asiko mìtọn wá, omẹ dagbe lọ na húhú ohọ̀n mìtọn, bọ ayiha mìtọn lọsu nasọ sọgbè hẹ ẹ. Ṣigba omẹ dopo gẽ wẹ ayiha mìtọn na sọgbè hẹ, bo ma yín na omẹ awe kavi atọ̀n gba, ṣigba mì dóna mọdona ehe yín aliho Jiwheyẹwhe tọn na gbẹ̀zán mìtọn. Na omẹ winyanwinyan lẹ tindo onú nẹlẹ pó to alọ yetọn lẹ mẹ, nado nọ̀gbẹ̀ to alọwle he yín ayajẹnọ podọ donanọ sọn Jiwheyẹwhe de. Ṣigba yẹn sọ to didọ hlan mì whladopo dogọ́, dọ, gbẹ̀zán asú po asì po tọn kàn mì omẹ winyanwinyan lẹ. Enẹwutu, mì yise to yẹn mẹ bo sọ kẹalọyí ehe di ohó pahonamẹ tọn de, kẹdẹdi ohó de na dagbe mìtọn. Yẹn sọ to didọ hlan mì whladopo dogọ́, mì ma dọn mídelẹ biọ núdepope mẹ blo eyín mì matindo kándeji to yé mẹ, dọ, omẹ he lọ wẹ Jiwheyẹwhe ko dè na mi!

Podọ eyín yé yọ́nẹn, e ma na bọawuna mí nado yígbèna núhe to jijọ̀ to azán mítọn lẹ mẹ gba. Podọ dogọ́ to azán mítọn lẹ mẹ, na winyan daho de ni hù mí. Ṣogan onú lẹ ko diọ, ṣigba Ohó Jiuwheyẹwhe tọn ma nọ diọ gba. Mì sọgan dọ, dọmọ: “Nọvisunnu Frank è, enẹ lọ tin na otọ́ otọ́ ṣie lẹ tọn po onọ̀ onọ̀ ṣie lẹ tọn po”. Podọ núhe Jiwheyẹwhe zé na mẹjitọ otọ́ mítọn lẹ tọn po onọ̀ mítọn lẹ tọn po, Ewọ ko zé e dai na ovi lẹ po ovivi lẹ po ga. Podọ do hùkàn nẹ lọ tọn ji wẹ mí dóna tò mídelẹ do. Mì na wá yọ́n dagbe na mi, na mì na wá tindo dagbe to aliho mìtọn lẹ ji, bọ dona Jiwheyẹwhe tọn na tin to aliho mìtọn lẹ mẹ. Whenẹnu mí ma sọ dóhudo nado kànbiọ dọ: “Etẹwutu wẹ ehe do yín mọ bọ enẹ lọ sọ sọawúhia dó mọ”? Ṣigba yè wlánwé etọn dọmọ: “Etẹ yọpọsunnu nado klọ́ aliho etọn? Gbọn awuhihọ hlan ẹn dali kẹdẹdi ohó towe” (PSALM 119:9). Podọ Biblu sọ dọ to ofi, yèdọ ehe mí ko hia dọmọ: “Na dopodopo to mì mẹ nado yọ́n lé é do nọ zán onú zinzán etọn dó”, e ma na yín to whihla de mẹ kavi to ninọ̀mẹ alọpa depope mẹ gba, ṣigba to yẹyi po jijọwiwé po mẹ. Enẹ lọ wẹ núhe Ohó Jiwheyẹwhe tọn to didọ dogbọn ohóta he lọ tọn dali. Na yè ma wlán to ofi depope dọ, “na nọviyọnnu de ni dín asú de to yẹyi po jijọwiwé po mẹ” gba. Lala, ṣigba yọnnu lọ wẹ yè nọ dín, yèdọ mẹhe yè na yí bọ ewọ na nọnọ̀ whégbè, kaka jẹ whenuena azán etọn po ojlẹ etọn po na wá.

Adavo yè payi onú nẹlẹ pó go, whenẹnu wẹ gbẹ̀zán asú po asì po tọn na yín donanọ bo sọ nọ ṣẹ̀ to dagbe mẹ. Yè ma sọ dóhudo nado to yìgọ̀-yìgọ̀ yì gba, na Jiwheyẹwhe ko dona whédo lọ, ewọ nasọ to donanọ yín zọnmî. Ṣigba ninọ̀mẹ delẹ tin, ehelẹ sọ to dandanmẹ nado yín zinzán. Podọ mẹdepope he to yìyì kẹdẹdi ohó Jiwheyẹwhe tọn, na gbẹ̀n dona, yèdọ adọkun dona tọn he họakuẹ. Eyín mẹde lẹn dọ, “Yẹn na tọ́nsọn yé mẹ na dẽ.” Ṣigba mẹnu wẹ nọ wá pego nado tọ́nsọn whlepọ́n lẹ mẹ? Etẹwutu awubla lẹ do to sùsù sọmọ, yèdọ to asú po asì po he yín yisenọ lẹ mẹ ga? Na linlẹn dagbe po sisi hlan mẹnọzo po ko juwáyì, podọ e nọ yín tukla nado nọnọ̀ kọ̀ndopọ́ mẹ, na linlẹn dagbe hlan mẹnọzo ko bú na yè hẹn onú lẹ do madógan mẹ wutu. Ṣigba Ohó Jiwheyẹwhe tọn nọ hlẹali omẹ, ewọ nọ táhinhọ́nna mí, ewọ sọ nọ wà ẹ to onú nẹlẹ mẹ ga. Jiwheyẹwhe na gọ́alọna mí omẹ pó, nado dọ titegbe dọ, jọunjọja lẹ. To ninọ̀mẹ he mẹ, mí ko dọhó ohóta dopodopo Biblu mẹ tọn ji. Etẹwutu, mí nado dọhó po mẹdekannu po podọ gbahungba dogbọn ohóta he lọ tọn dali, kẹdẹdilé mí ko wà ẹ dó to whèjai he?

Whladopo dogọ́, mẹyinwanna jọunjọja sunnu lẹ emi, mì yí mi sè, na ayiha mítọn lẹpo wẹ lẹ́ hlan mì de. Na mí ma jlo dọ mì ni jiya gba, ṣigba na ayajijẹ po dona Jiwheyẹwhe Ganhúnupò tọn po ni jẹdo mì ji. Ṣigba yẹn tindo ehe to ayiha ṣie mẹ nado dọ hlan mì whladopo dogọ́, dọmọ: whẹpo mì nado ṣẹ̀ ohọ̀n alọpa depope húhú ji, mì zán whenu susu na odẹ̀. Mì ma dóhudo nado hodẹ̀ do enẹ lọ ji dẹnsọlé mì ma ko dó owhè he jẹ lọ gba. E ma yín owhè fọtọ̀n-nukun-dopo (16 ans), kavi fọtọ̀n-nukun-awe (17 ans) gba. Ṣigba sọn owhè fọtọ̀n-nukun-ẹnẹ (19 ans), kavi owhè kò (20 ans), mì tindo whenu nado ṣẹ̀ odẹ̀ho mimọ dọ e ko dọ̀nsẹpọ́ mì… Enẹwutu, mì ma dọ̀n mìde biọ otànhó he na hẹn mì jiya mẹ blo. Podọ whenuena mì hodẹ̀, mì ni hodẹ̀ vivẹvivẹ to Jiwheyẹwhe Ganhúnupò nukọn, Ewọ nasọ siọ mì nugbonugbo. Ewọ nasọ zé núhe mì dóna wà lọ do ayiha mìtọn mẹ, podọ do ayiha mẹhe jẹ lọ tọn mẹ nugbonugbo.

Do ayi e go, yẹn ma ko sè gbèdé dọ, jọunjọja sunnu he tindo kándèji to Jiwheyẹwhe nukọn dọ, ewọ wẹ yọnnu he lọ tin na, podọ whenuena ewọ na zinzọnlin jẹ yọnnu lọ de, yọnnu lọ na wá dọ hlan ẹn, dọ, “Lala”. Ṣigba kándèji nẹ lọ dóna tin to finẹ. Podọ Jiwheyẹwhe kẹdẹ wẹ sọgan zè enẹ lọ do ayiha mẹ na omẹ. Do ayi e go, ewọ ma sọgan wá gbọn odlọ po onú devo de dali gba. Na odlọ lẹ tindo tùnmẹ devo lẹ wutu. Podọ to ofi, mí ma to ohó odlọ tọn dọ gba, ṣigba mí to nújijọ̀ nugbo tọn dọ, podọ owhẹ̀jijọ nẹ lọ tọn wutu wẹ Jiwheyẹwhe dóna gọ́alọna mí gbọn ojọmiọn Etọn dali.

Ṣigba dilé mí ko dọ dote dó, dọ: tintan, mì dóna nọtepọ́n asiko he jẹ lọ, na mì ma nado biọ tukla lẹ mẹ. To enẹgodo, whẹpo mì nado wà núdepope, mì hodẹ̀ whẹ́ bo sọ tindo kándèji de sọn Jiwheyẹwhe de. Na e ma jẹ na jọunjọja sunnu de nado dopagbè na jọunjọja yọnnu de, to enẹgodo ewọ nasọ wá gbẹ ẹ dai. Enẹ lọ ma sọgbè gba. Ṣigba eyín yè nado wà núde, núhe mí to didọ lọ dóna yín didọ to Jiwheyẹwhe nukọn. Podọ nado dọ ẹ, yè dóna yín whinwhẹ sọmọ, ma nado dọ núde to nukuntintọ́n mẹ. Ṣigba yè dóna dó owhè lọ, na yè nido zé onú lẹ hẹn alọ mẹ podọ to huhlọn mẹ nado wàzọ́n, whenẹnu enẹ lọ na sọgbè. Na omẹ depope ma sọgan wà onú mọhunkọ tọn de gba, dọ, whenuena yè dopagbè na jọunjọja yọnnu de, ehe sọgan yín dọ yè basi to tódidó mẹ nado dà ẹ, etẹwẹ enẹ lọ na yín? Enẹ lọ ma jẹ na yisenọ lẹ lala. Enẹwutu wẹ yè dóna dónù abọẹ bo nọte kaka jẹ whenuena ojlẹ lọ na wá. Whenẹnu mì nasọ tindo jlọjẹ nado dọhó. Podọ whenuena mì na dọhó, na “mọwẹ” mìtọn ni yín “mọwẹ” he go yè sọgan dèji do. Whenẹnu wẹ ali lọ na yín didè na gbẹ̀zán donanọ de to kọ̀ndopọ́ mẹ.

Yẹn yise dọ enẹ lọ ko gọ́alọna mí bo sọ wà dagbena mí, to alọ de mẹ kavi to devo mẹ, hlan mí omẹ he tin to ofi lẹpo, hlan omẹ winyanwinyan lẹ podọ hlan mẹho lẹ. Podọ ga, na ehe lọ nido sọgan gọ́alọna yé he ko dà yédelẹ. Na to whepoponu, Ohó Jiwheyẹwhe tọn wẹ tindo núde nado dọ hlan mí. Eyín míwlẹ sọ dó osi hlan ẹn, mí ko yín donanọ dote sọn dona Jiwheyẹwhe Ganhúnupò tọn mẹ. Na Oklunọ ni gọ́alọna mí, bo ná mí jọmiọn, dọ, to nukọnyìyì mẹ, na núhe kàn gbèmimá he lọ, na mí nido sọgan nado nọtepọ́n ojlẹ lọ, bo nado sọgan yì Oklunọ nukọn to odẹ̀ mẹ. Podọ núhe mí na wà lẹ ma nado yín yìgọ̀-yìgọ̀, podọ yè ma na hẹn tódidó mítọn lẹ nado yì to ovọ̀ mẹ. Ṣigba na onú lọ ni yín wiwà to ayiha mẹ, bọ núhe mí lẹn dọ mí to didọ, podọ na mẹhe tọn ohó lọ yín nado zé e do ayiha etọn mẹ po kándèji de po ma nado hẹn ẹn bú to azán depope ji gba. Do ayi e go, mí to núhe lẹ dọ po kándèji de po. Na mẹdepope ni ma gbà osẹ́n lọ blo, na Jiwheyẹwhe na yíahọ́sú onú nẹlẹ pó tọn. Mí sọgan yì nukọn bo sọ yì godo to onú devo lẹ mẹ, ṣigba e ma yín po ohóta he lọ po gba. Na po ehe lọ po, mẹdepope matindo jlọjẹ nado wà ehe podọ enẹ gba, ṣigba Jiwheyẹwhe dóna zé gbèmimá he lọ do ayiha mítọn mẹ gbọn odẹ̀ mẹ. Na godo he mì ko wà mọ vọ, mì na mọ dọ, gbọn ojọmiọn Jiwheyẹwhe tọn dali, É sọgan dègbè dona Etọn tọn. Na Oklunọ ni tin hẹ mì omẹ pó, nado dọ titegbe dọ, po jọunjọja mítọn lẹ po. Bé e ma na yín onú dagbe lọ to finẹ, dọ, jọunjọja mítọn lẹ ni hodẹ̀ vivẹ to egbé, dọ yé omẹ pó ni hodẹ̀ po huhlọn yetọn lẹ po, bo nasọ dọnudo Oklunọ na Ohó Etọn Wiwé lọ podọ vivẹ lọ. Enẹwutu, mí gbọ na mí ni fọ́nṣite nado wà ẹ!

Otọ́ olọn tọn È, mí mọ awúsọhiamẹ Towe po dona Towe po, O Jiwheyẹwhe È. Dinvie, yẹn vẹ̀ We Oklunọ, Hiẹ Mẹhe yín dodonọ, na ohó he lọ ni ma lẹ́gọ̀do de We ma wàzọ́n blo. O Oklunọ È, gbọ na ewọ ni wà ojlo Towe! O Jiwheyẹwhe È, gbọ na madógánnọ lẹ ni jẹgángán, na jijọho Towe ni tin to ayiha lẹ mẹ, podọ na ewọ ni dùahọlu to mí ji gbọn ojọmiọn Towe dali. O Jiwheyẹwhe È, na jijọho Towe he lọ ni tin to asú po asì po lẹ mẹ, to whẹndo lẹ mẹ, podọ to ayiha dopodopo mẹ. Oklunọ, Hiẹ Mẹhe yín dodonọ, mí to vivẹ̀ We whladopo dogọ́, na Hiẹ ni basi jọmiọn hlan omẹ dopodopo nado yí pahonamẹhó Ohó Towe tọn  hẹn ayiha yetọn lẹ mẹ, na mí nido yín whiwhla sọn whlepọ́n lẹ mẹ, sọn awubla lẹ mẹ, podọ sọn awutu lẹ mẹ. O Jiwheyẹwhe È, na omẹ depope ni ma lẹn dọ ewọ tindo nukọnyìyì etọn to alọ ede tọn mẹ blo! Enẹwutu, Jiwheyẹwhe ṣie È, gbẹ̀zán mítọn lẹ tin to alọ Towe mẹ, podọ mí omẹ pó dóhudo dona Towe tọn. Oklunọ È, enẹwutu wẹ Ohó Towe do dọ lé dona Towe na wá míde dó; podọ nado yín pinplán gbọn Ohó Towe dali. O Jiwheyẹwhe È, gbọ na ehe ni yín azán gbèmimá tọn hlan jọunjọja mítọn sunnu lẹpo po jọunjọja mítọn yọnnu lẹpo po! Oklunọ È, na ehe lọ ni dọhó do ayiha yetọn lẹ mẹ, na yé ma nado zinzọnlin to aliho yetọn titi lẹ mẹ, adavo to aliho Towe kẹdẹ mẹ. Enẹwutu, mí dọnudo We bo sọ pà We to Oyín Jesu tọn mẹ. Nisẹ!