Cluj, Romania - April 11th, 1992, 10:00

Yẹn yín homẹhunnọ hlan Jiwheyẹwhe, na mí tindo jlọjẹ nado tin to otẹn he mẹ to egbè. Mí yise sọn sisosiso ayiha mítọn tọn mẹ, dọ, Oklunọ tin to ofi, mí sọ yise dọ, É na dọhó hlan mí gbọn Ohó Etọn mẹ.

E to dandan mẹ dọ, mí nido zé linlẹn mítọn lẹ dai do apá dopo nado dotó Ohó lọ po ayiha mítọn po. To ojlẹ delẹ mẹ, nọvisunnu lẹ nọ wá po linlẹn yetọn titi lẹ po, bo ma sọ nọ sè Ohó he yè dọ hlan yé lẹ gba, ṣigba po linlẹn yetọn po yé ma sọgan kẹalọyí Ohó lọ do yéde lẹ mẹ gba.

Na enẹwutu, e ma dóna yín mọ na mí gba. Yẹn tindo kàndeji dọ mí dojlo nado sè Ohó nugbo Jiwheyẹwhe tọn, bo ma nado ṣaka Ohó Etọn po linlẹn mí tọn lẹ po gba, kẹdẹdilé mí hia do to Owé ISAIA 55:8-9 tọn mẹ, dọ, “Na linlẹn ṣie ma yín linlẹn mìtọn, mọ aliho mìtọn ma yín aliho ṣie, wẹ OKLUNỌ dọ. Na lé olọn yì oji hú aigba do, mọkẹdẹ wẹ aliho ṣie yì oji hú aliho mìtọn, linlẹn ṣie hú linlẹn mìtọn.”

E dóna yín ojlo mítọn to egbè dọ, aliho Etọn lẹ nido yín aliho mítọn lẹ, podọ linlẹn Etọn lẹ nido lẹzùn linlẹn mítọn lẹ, na mí nido lẹzùn apáde Ohó lọ tọn, kẹdẹdilé Ewọ yín Ohó he yè diọ zùn agbasalan do.

Mí tindo ohókànbiọ delẹ he mí dójlo nado ná gblọndo yetọn. Ohókànbiọ titegbe lọ to whelẹponu wẹ yín núhe kàn Jiwheyẹwhe yínyín. Mì gbọ ma dọ ehe na mì: Jiwheyẹwhe ma sọgan yín tuntunmẹ gba, Jiwheyẹwhe yì oji hú domọnanú mí gbẹtọ lẹ tọn. Yẹwhegán de ma pégo nado tunmẹ Jiwheyẹwhe, kavi apọsteli de gba: yé omẹ pó gbọn núdohiamẹ he yè ko dohia yé gbọn Jiwheyẹwhe ṣokẹdẹ dali.

Whenuena Paul dọhó núdabla Jiwheyẹwhe tọn tọn to Owé I TIMỌTI 3:16 tọn mẹ, é dọhó Owé Wiwé he é mọdona hézéhézé tọn, dọ, dọmọ: “Podọ matin núdindọn, daho wẹ núdabla jijọ-di-Jiwheyẹwhe tọn: yè yí Jiwheyẹwhe hia to agbasa mẹ…” Enẹ lọ ko pé, é ma sọ dóhùdo nado dọhó hú mọ gba, na enẹ lọ wẹ yín núdabla Jiwheyẹwhe tọn lẹpo he yè hùndohia: Jiwheyẹwhe he yín Gbigbọ sọawúhia to ninọ̀mẹ gbẹtọ tọn mẹ, to agbasa gohọ̀ tọn de mẹ.

Mí na dọhó dogbọn lé Jiwheyẹwhe do Ede hia dó to alọ vòvo mẹ matin tadena. Kẹdẹdilé yẹn ko dọ dó, núdabla lọ yì ji hú domọnanú gbẹtọ tọn kavi tunmẹ de gbọn ohó lẹ dali, ṣigba e dóna yín yiyise sọn sisosiso ayiha lẹ tọn tọn mẹ.

Núdepope he kàn Jiwheyẹwhe kavi Ohó Jiwheyẹwhe tọn, dóna yín didohia gbọn Gbigbọ Wiwé dali. Podọ núdohiamẹ mọhunkọ tọn ma sọgan yín tuntunmẹ jẹagọ gba. Kẹdẹdilé e kàn Jiwheyẹwhe yínyín dó, mí dóna mọdona vogbingbọn he tin to ṣẹnṣẹn “madopòdo tọn” po “bibẹ́nu azán tọn” po. To madopòdo mẹ, Jiwheyẹwhe tin na Ede to hinhọ́n po gigo madopòdo po mẹ. Mẹde ma sọgan mọ Ẹn. Yè wlán ẹn to Owé JOHANU 1:18 tọn mẹ, dọ, “Mẹde ma mọ Jiwheyẹwhe gbèdé; Ovi dètọ́n dopo akàn lọ, he ko tin to akọ́nnu Otọ́ tọn, ewọ lọ wẹ do é hia.”

To Owé 1 JOHANU 4:12 tọn mẹ, yè wlán ẹn, dọ, “Mẹdepope ma mọ Jiwheyẹwhe whedepopenu gbèdé. Eyín mí yinwanna mínọzo, bé Jiwheyẹwhe to ninọ̀ mí mẹ, yè sọ hẹn owanyin etọn sọgbe to mí mẹ.”

To sisi de mẹ, yẹn sọ dojlo nado hia Owé 1 TIMỌTI 6:16 tọn, to ofi, mí hia dogbọn “Oklunọ Jiwheyẹwhe” tọn dali, “Ahọlu ahọlu lẹ tọn”, podọ “Oklunọ oklunọ lẹ tọn”: “Mẹhe ewọ dopo kẹdẹ wẹ tindo makú, bo nọnọ̀ hinhọ́n mẹ, he mẹde ma sọgan sẹpọ́; mẹhe mẹde ma ko mọ gbèdé, bọ yé ma sọgan mọ…”

Dinvie, mí wá ohókànbiọ lọ ji: Mẹnu wẹ Adam mọ? Mẹnu wẹ Ablaham mọ? Mẹnu wẹ Mọse mọ? Mẹnu wẹ mẹhe dọhó hlan yẹwhegán lẹ? Ehe wẹ núdabla daho lọ: Jiwheyẹwhe he yín Gbigbọ to ninọ̀mẹ Ede tọn mẹ, bo ma sọ sọgan yín mimọ gbọn omẹ depope dali, Mẹhe tọ́njẹgbonu sọn madopòdo mẹ biọ whenu lẹ mẹ. É zé agbasalan de do, podọ núdohiamẹ Jiwheyẹwhe tọn he lọ wẹ yè ylọ dọ, “Logos” he yín Ohó lọ to Alẹ̀nù Yọ́yọ́ mẹ.

Linlẹn awe wẹ tin: Ohó lọ “Logos”, podọ Ohó “Rhema”. Jesu ma yín “Rhema” gba, ṣigba Jesu wẹ “Logos”. “Rhema” wẹ yín núhe É dọ. Whenuena É dọ hlan nukuntọnnọ dọ, “Mọ nukunnumọ towe yí”; enẹ wẹ yín “Rhema”. Ṣigba Ewlọsu na Ede wẹ “Logos”, Mẹhe ko sọawúhia jẹgbonu sọn whẹ́whẹ́whenu to gigọfla Jiwheyẹwhe tọn mẹ.

To Alẹ̀nù Hóhó mẹ, yè ylọ Jiwheyẹwhe dọ Yahweh, podọ to Alẹ̀nù Yọ́yọ́ mẹ, É yín yiylọ dọ Yahshua. To Alẹ̀nù Hóhó mẹ, É tin to agbasa gbigbọnọ de mẹ, podọ to Alẹ̀nù Yọ́yọ́ mẹ, É tin to agbasa gohọ̀ tọn de mẹ. É dóna lẹzùn gbẹtọ na gbẹtọ lẹ tọn wutu.

Yẹn na hia sọn Owé GENẸSISI 1:27 tọn mẹ, “Mọwẹ Jiwheyẹwhe dá gbẹtọ to boṣiọ etọn titi mẹ, to boṣiọ Jiwheyẹwhe tọn mẹ wẹ é dá ẹ do…” To whennẹnu, Jiwheyẹwhe ma ko sọawúhia to agbasalan mẹ, ṣigba to agbasa gbigbọnọ de tọn mẹ di Logos, kẹdẹdi Omẹ he zinzọnlin bo sọ yín didohia to ninọ̀mẹ gbẹtọ tọn de mẹ. Jiwheyẹwhe, kẹdẹdi “Elohim” yín Mẹhe nukun ma nọ mọ. Kẹdẹdilé Owé JOHANU 4:24 tọn dọ do, dọ: “Gbigbọ wẹ Jiwheyẹwhe: e jẹ yé he to sinsẹ̀n ẹn lẹ ni nọ sẹ̀n ẹn to gbigbọ mẹ podọ to nugbo mẹ.” Ṣigba É wá sọawúhia to ninọ̀mẹ agbasalan tọn de mẹ. To apájlẹ he mẹ, É dá gbẹtọ kẹdẹdilé mí ko hia dó jẹnukọn: “Jiwheyẹwhe dá gbẹtọ to boṣiọ etọn titi mẹ…” E ma yín to madopòdo yínyín mẹ gba. To ofi yè ko ṣẹ̀ azán lẹ hia ji. Na whenu he, e yín winwlán to Owé JOHANU 1:1 tọn mẹ, dọ, “To whẹ́whẹ́whenu wẹ Ohó lọ ko tin…” E ma yín to madopòdo mẹ gba, ṣigba “to bibẹ́nu”. Whenuena Jiwheyẹwhe tọ́nsọn madopòdo mẹ biọ whenu lẹ mẹ, Ewọ Mẹhe yín Gbigbọ sọawúhia to ninọ̀mẹ agbasalan tọn de mẹ. “To whẹ́whẹ́whenu wẹ Ohó lọ ko tin, Ohó lọ ko tin po Jiwheyẹwhe po, Ohó lọ wẹ Jiwheyẹwhe.”

E bọawu titegbe. Eyín mí hia Biblu, mí na mọ dọ núdohiamẹ ma tin to madopòdo mẹ gba. Jiwheyẹwhe he nukun ma nọ mọ tin to madopòdo mẹ to gigọfla hinhọ́n tọn po Gbigbọ tọn po mẹ, ṣigba to bibẹ́nu, É sọawúhia kẹdẹdi Oklunọ-nado dọ, enẹ wẹ núdohiamẹ Jiwheyẹwhe Lọsu tọn.

Dinvie, yẹn na jlo dọ mì ni tùntóai do onú vivẹ de go: didá awe wẹ tin: vivọnu Owé GENẸSISI 1 tọn to didọ, dọ, Jiwheyẹwhe dá onú lẹpo. To Owé GENẸSISI 2:1-5 tọn mẹ, yè dọ hlan mí – yẹn na hia afọ tintan po awetọ lọ po: “Lé wẹ yè dotana olọn po aigba po, po awhànpa yetọn lẹpo po. To azán ṣinawetọ gbè Jiwheyẹwhe dotana azọ́n etọn he é basi; é sọ gbọ̀jẹ to azán ṣinawetọ gbè sọn ehe é basi lẹpo mẹ. Jiwheyẹwhe dona azán ṣinawetọ bo sọ klán ẹn do wiwé: na e mẹ wẹ é ko gbọ̀jẹ te sọn azọ́n etọn mẹ he Jiwheyẹwhe dá bo sọ basi i wutu. Ehelẹ wẹ whẹndo olọn tọn po aigba tọn po, whenuena yé dá yé. To azán he mẹ Oklunọ Jiwheyẹwhe dá aigba po olọn po. Podọ atín dido dàngbo tọn de ma tin dinvie to aigba ji, podọ omá dàngbo tọn de ma ko tọ́nkùn gba. Na Oklunọ Jiwheyẹwhe ma ko hẹn jikun ja do aigba ji gba. Podọ sunnu de ma tin nado pọ̀ aigba.”

Bé mì omẹ pó ko hia hodo mi? To ota tintan mẹ, mí hia dọ: “Jiwheyẹwhe dá gbẹtọ to apájlẹ etọn titi mẹ.” Mí lẹn dọ ehe ko jọ bo sọ wá ayi mẹ. E yín mọ, ṣigba gbẹtọ tintan yín didá to agbasa gbigbọnọ de mẹ. Ehe lọ jọ to Owé GENẸSISI ota tintan tọn mẹ. To Owé GENẸSISI ota awetọ tọn mẹ, gbẹtọ yín didá sọn kọ̀gudu aigba tọn mẹ. Gbẹtọ dopolọ he yè dá to agbasa gbigbọnọ mẹ dóna yín gigọ̀do gohọ̀ agbasalan tọn de mẹ. Mọwẹ Adam yín didá dó to agbasalan mẹ, to whenẹnu adàja etọn hùn bọ Evi yín didètọ́n jẹgbonu sọn é mẹ. E ma yín to whenuena é tin to agbasa gbigbọnọ tọn de mẹ gba, ṣigba whenuena é yín didó sọn kọ̀gudu aigba tọn mẹ.

To ofi, núdabla daho de yín whiwhla. To Owé 1 KỌLINTINU 15 tọn mẹ, Jesu Klisti yín yiylọ dọ “Adam awetọ”. Whenuena Ewọ tin to agbasalan gbigbọnọ de mẹ Asivu lọ ma sọgan yín didètọ́n jẹgbonu sọn É mẹ gba.

To Osó Kalvali tọn ji, adàja Etọn hùn bọ ohún Etọn yín kinkọ̀ndai na whlẹngan mítọn. To Owé EFESUNU 5:32 tọn mẹ, Paul wlán dọ, “Núdabla daho wẹ ehe: ṣigba Klisti po agùn tọn po wẹ yẹn to didọ.” Na enẹwutu, e to dandan mẹ nado mọdona núdohiamẹ jijlọ Jiwheyẹwhe tọn. Dopo to ohókànbiọ lẹ mẹ wẹ yín dọ: “Etẹ wẹ Oyín Otọ́ tọn?” Na Jesu dọ to Owé JOHANU 5:43 tọn mẹ - mì gbọ mí ni hia dopọ́, ehe wẹ núplọ́nmẹ Biblu tọn e ma yín yẹwhehó gba – “Yẹn wá to oyín Otọ́ ṣie tọn mẹ, mì ma sọ yí mi.” Ehe wẹ núdabla lọ. Mẹdelẹ dọ dọ, oyín nẹ lọ wẹ yín Yahweh kavi Jehova, e ma yín mọ gba.

Mí dóna mọdona núhe bọdo e go lẹ: to Alẹ̀nù Hóhó mẹ, ohógbè de ma tin he yín “Otọ́”. Adavo “Oklunọ Jiwheyẹwhe” kẹdẹ. Na mìwlẹ tọn wẹ nado mọdona hézéhézé! Yẹn jlo na dọ ehe: to Owé GENẸSISI ota tintan po ota awetọ po mẹ jẹ afọ atọ̀n, ohógbè he yín “Jiwheyẹwhe” kẹdẹ wẹ tin to finẹ, e ma yín “Oklunọ” gba – “Elohim” tindo tunmẹ. To bibẹ́nu, Elohim dá olọn po aigba po, Elohim dọ, bọ e sọ yín mọ, Elohim dọhó bọ e sọ jọ. Elohim kẹdẹ wẹ, e ma yín Yahweh gba.

Sọn Owé GENẸSISI 2:4 tọn mẹ, wẹ núdidá jọwamọ lẹ ṣẹ̀ sọn, whenuena gbẹtọ yín didó sọn kọ̀gudu aigba tọn mẹ, sọn whenẹnu wẹ mí mọ kọ̀ndopọ́ “Elohim po Yahweh tọn po” te – ehe to dandan mẹ dọ, to nugbo de mẹ Elohim kẹdẹ wẹ tin to finẹ. Ṣigba sọn ojlẹ he mẹ Elohim sọawúhia to agbasalan mẹ to gbaungba, wẹ yè ylọ Ẹ dọ Yahweh, madopòdo. Ehe wẹ “Logos” lọ, he tọ́njẹgbonu sọn Jiwheyẹwhe mẹ to bibẹ́nu. Enẹ wẹ Mẹhe dọhó, Mẹhe dá onú lẹpo, Mẹhe zinzọnlin to jipa Edẹni tọn mẹ. Ewọ wẹ dọhó hlan Mọse, hlan Ablaham, bo do Ede hia hlan yẹwhegán lẹpo to awúsọhia gbaungba tọn de mẹ, to núdohiamẹ Jiwheyẹwhe he nukun ma nọ mọ tọn, Mẹhe tọ́njẹgbonu sọn gigọ́ yínyín Etọn mẹ, mọwẹ e yín podọ mọwẹ mí nasọ kẹalọyí dó.

Mẹdelẹ to núdọn, dọ: “Mẹnu wẹ kú?” Mẹdelẹ dọ, dọ: Jiwheyẹwhe wẹ kú, ṣigba Jiwheyẹwhe yín makú bo ma sọ sọgan kú gba. Eyín Jiwheyẹwhe wẹ kú, mí ma na ko tin to ofi to egbè gba. Jiwheyẹwhe ma sọgan kú gba, na Gbigbọ wẹ Jiwheyẹwhe, Ewọ wẹ Gbigbọ madopòdo tọn. Mẹnu wẹ kú? Jesu Klisti wẹ.

Yẹn na hia owéfọ delẹ nado do ehe lọ hia mì hézéhézé sọn Owé Wiwé mẹ, na yẹn lẹn dọ e to dandan mẹ. “Lé aigbanù te, mọwẹ yé ga he yín aigbanù te; podọ lé olọnnù te, mọwẹ yé ga he yín olọnnù te” (I KỌLINTINU 15:48). Bé mì omẹ pó sè dagbedagbe? Mẹnu wẹ yín olọnnù lọ? Jesu Klisti Oklunọ mítọn wẹ. Ewọ wẹ kú. Ofi wẹ núdabla daho lọ te.

Jiwheyẹwhe jlo nado tindo visunnu lẹ po viyọnnu lẹ po to madopòdo mẹ, ṣigba gbẹtọ jai biọ ylando mẹ bo yín hihia hlan okú. Enẹwutu, Jiwheyẹwhe dóna basi agbasa de, bo ṣẹ̀ nado ylọ whẹndo yọ́yọ́ de wá ayi mẹ, bọ ehe lọ ṣẹ̀ po Klisti po.

Owé PSALM 2:7 tọn, dọ, dọmọ “…Hiẹ wẹ Ovi ṣie; Egbé wẹ yẹn dè we tọ́n”. Jiwheyẹwhe ma yín jiji gba, ṣigba Jesu wẹ yè ji. Gbigbọ Wiwé ṣinyọn oyẹ Malia ji kẹdẹdilé angẹli Gabliẹli dọ dó: “… Enẹwutu ga onú wiwé he tin nado yín didètọ́n sọn hiẹ mẹ, Ovi Jiwheyẹwhe tọn yè na nọ ylọ ẹ” (LUKU 1:35).

To Owé OSỌHIA 3 tọn mẹ, wéma godo tọn he mí hia dọ, Klisti yín: “Omẹ tintan to núdidá Jiwheyẹwhe tọn lẹ mẹ”. Mì gbọ mí ni hia na mì nido yọ́nẹn dọ nugbo wẹ, “Podọ hlan angẹli he tin to Laodikea tọn kanwe; Onú helẹ wẹ Niṣẹ dọ, kunnudètọ dódónọ, nugbonọ, omẹ tintan to núdidá Jiwheyẹwhe tọn lẹ mẹ…” (OSỌHIA 3:14). E ma yín to bibẹ́nu núdidá pã lẹ tọn, kavi didá olọn po aihọn po tọn, ṣigba “… Omẹ tintan to didá Jiwheyẹwhe tọn mẹ”. Jiwheyẹwhe basi bibẹ́nu yọ́yọ́ to Klisti mẹ. Ewọ wẹ “… Ovisunnu tintan to mẹmẹsunnu lẹ ṣẹnṣẹn”. Ewọ wẹ yín bibẹ́nu yọ́yọ́ whẹndo Jiwheyẹwhe tọn tọn. Ewọ yín gbẹtọ, kanwe-kò do kanwe-kò ji. Podọ lé wẹ É yín jiji dó to aihọn he mẹ kẹdẹdi míwlẹ, na É nido sọgan whlẹn mí, podọ nado súahọ́ ylando mítọn lẹ tọn tọn, É gbawhàn okú tọn bo dè adí okú tọn sẹ.

Mí dike mí ni gọ̀yì Owé 1 KỌLINTINU 15:48 tọn mẹ, dọ, “Lé aigbanù te, mọwẹ yé ga he yín aigbanù te; podọ lé olọnnù te, mọwẹ yé ga he yín olọnnù te”. Yẹn sọ jlo nado hia Owé 1 KỌLINTINU 15:20-21 tọn, he dọ, dọmọ: “Ṣigba dinvie yè zé Klisti tite sọn oṣiọ lẹ mẹ, é sọ lẹzùn sinsẹ́n tintan yé he damlọn lẹ tọn. Na lé é yín dọ gbẹtọ dali wẹ okú gbọn wá, gbẹtọ dali ga wẹ fọ́nsọnkú oṣiọ lẹ tọn gbọn do wá.”

Bé mì omẹ pó sè ehe? Ohó Jiwheyẹwhe tọn wẹ. Susu wẹ yé mẹhe yise to kọ̀ndopọ́ Jiwheyẹwhe tọn mẹ, ṣigba yé sọ tin to núṣiwà mẹ, kẹdẹdilé yé mẹhe yise to yẹwhe-atọ̀n mẹ lẹ ṣinúwà dó. Yé nọ dọ, dọ, Jesu ma yín Jiwheyẹwhe gba, ṣigba lalo wẹ. Jiwheyẹwhe yín Jiwheyẹwhe dopo akàn he dó Ede hia to Klisti mẹ. Kẹdẹdi to Alẹ̀nù Hóhó mẹ, Jiwheyẹwhe yín “Elohim” bo sọ do Ede hia gbaungba di “Yahweh”, podọ yé mẹhe mọ “Yahweh” lẹpo sọgan dọ, dọ, mí ko mọ “Jiwheyẹwhe Elohim”. Ṣigba yé mọ núdohiamẹ Jiwheyẹwhe tọn na mí hia dọ mẹde ma sọgan mọ Jiwheyẹwhe gba.

Enẹ wẹ yín núhe jọ to Alẹ̀nù Yọ́yọ́ mẹ: Jiwheyẹwhe he nukun ma nọ mọ dó Ede hia gbaungba to Klisti mẹ. Enẹwutu wẹ Jesu sọgan dọ, dọ, “Mẹdepope he mọ mi ko mọ Otọ́” (JOHANU 14:9). “Dopo wẹ yẹn po Otọ́ po” (JOHANU 10:30). Ṣogan núdohiamẹ gbọnvo awe wẹ tin to finẹ. “Otọ́ ma yín Ovi gba”, “Ovi ma yín Otọ́ gba”, ṣigba Oklunọ wẹ Jiwheyẹwhe, podọ Jiwheyẹwhe wẹ Oklunọ.

Eyín “Otọ́” yín winwlán to Biblu mẹ, yín É yín winwlán fọtọ́n donu fọtọ́n, É dóna nọ̀ lé yè wlán Ẹn dó, na mì ma sọgan diọ Ẹ. Eyín “Ovi” yín winwlán to Biblu mẹ, é dóna nọ̀ mọ, na fi he e jẹ dọ é ni nọ̀ wẹ é te. Ohógbè awe helẹ ma sọgan yín didiọ gba. Ehe yín núvivẹ de.

Na apájlẹ, eyín mí to odẹ̀ho kẹdẹdilé Oklunọ mítọn plọ́n mí dó, “Otọ́ mítọn he tin to olọn mẹ…” Mọwẹ yè wlán ẹn dó, mọwẹ mí yise dó, mọwẹ mí sọ to wiwà dó. Mí ma sọgan hodẹ̀ dọ, “Ovi mítọn he tin to olọn mẹ” kavi “Gbigbọ mítọn he tin to olọn mẹ”, na lé wẹ yè wlán ẹn dọ, eyín mí to dẹ̀ho, mí ni nọ dọ, dọ, “Otọ́ mítọn he tin to olọn mẹ, hihiọ wẹ Oyín Towe…”

Whladopo dogọ́, mì gbọ na mí ni gọ̀yì Oyín lọ ji. Oyín Otọ́ tọn, Ovi tọn, po Gbigbọ Wiwé tọn po, Oyín dopo wẹ. Kẹdẹdilé yẹn ko dọ dó wáyì, to Alẹ̀nù Hóhó mẹ, Jiwheyẹwhe ma do Ede hia taidi “Otọ́” gba.

Bé mẹnu wẹ tin to mì mẹ to fi he oyín etọn nọ yín otọ́? Mì ko yín gbẹtọ sọn ojlẹ dindẹn mẹ, ṣigba mì ma yín otọ́ sọn ojlẹ dindẹn mẹ gba. Whenuena ovi de yín jiji wẹ sunnu de nọ lẹzùn otọ́. Bé mì mọdona? Whenẹnu wẹ Owé Wiwé yín ṣiṣẹ̀, dọ: “… Hiẹ wẹ Ovi ṣie; Egbé wẹ yẹn dè we tọ́n” (PSALM 2:7), (2 SAMUẸLI 7:14); kọ̀ndopọ́ Otọ́ po Ovi po tọn yín nú nugbo, whẹpo e do yín mọ, “Jiwheyẹwhe wẹ Oklunọ”, ṣigba e ma yín Otọ́ po Ovi po gba.

Yẹwhegán de matin to Alẹ̀nù Hóhó mẹ he hodẹ̀, dọmọ: “Otọ́ mítọn he tin to olọn mẹ”. E ma sọgan jọ, na e ma yín onú titegbe lọ wutu. Whenuena mí hodo núdohiamẹ Jiwheyẹwhe tọn podọ didè titò Etọn tọn jẹnukọnna owhèta lẹ, mí mọ dọ Jiwheyẹwhe tindo núhọ̀akuẹ lẹ. Ojlo Etọn wẹ nado lẹzùn Otọ́, na É jlo nado tindo visunnu lẹ po viyọnnu lẹ po. To whenẹnu bibẹ́nu lọ ṣẹ̀ sọn Ovisunnu Etọn dopo akàn lọ mẹ, dọmọ: “… Ehe wẹ Visunnu ṣie; Mẹvivẹ ṣie, mẹhe mẹ homẹ ṣie vivi te talala. Mì nọ sè etọn” (MATIU 17:5; MATIU 3:17).

E ma yín Jiwheyẹwhe wẹ kú gba, ṣigba Oklunọ wẹ yín Mẹhe kú. E ma yín Otọ́ wẹ kú gba, ṣigba Ovi wẹ kú. Kẹdẹdilé mí ko hia dó (yẹn dótódido dọ mì ma na wọnji owéfọ he lọ go), É lẹzùn gbẹtọ de na gbẹtọ lẹ tọn wutu. É dóna yín gbẹtọ nado whlẹn mí.

Yẹn na hia Owé 1 KỌLINTINU 15:48 tọn lọ dogọ́: “Lé aigbanù te, mọwẹ yé ga he yín aigbanù te; podọ lé olọnnù te, mọwẹ yé he yín olọnnù te.” Na Oyín Oklunọ tọn ni yín pipà na núdohia dabla Jiwheyẹwhe tọn he to Klisti mẹ.

Yẹn jlo na hia sọn Owé LOMUNU 5:12,15 tọn mẹ, dọ: “Enẹwutu lé ylando gbọn omẹ dopo de biọ aihọn mẹ, podọ okú gbọn ylando dali; mọwẹ gbẹtọ lẹ kú do, na omẹ popo wẹ wàylan wutu…” Dinvie afọ etọn 15: “Ṣigba lé ylando te ma wẹ núniná vọnu lọ te ga gba. Na eyín gbọn ylando omẹ dopo tọn dali omẹ sùsù zùn oṣiọ, nẹmunẹmu wẹ ojọmiọn Jiwheyẹwhe tọn, podọ núniná gbọn omẹ dopo Jesu Klisti dali, ko zùnsùsù hlan omẹ sùsù.”

Bé mì omẹ pó hia hodo mi? Gbọn omẹ dopo dali, yèdọ Jesu Klisti. Ehe kàn whlẹngan podọ kẹdẹdilé okú wá omẹ pó ji dó, mọwẹ okú dóna yín vivàsúdo dó. Podọ omẹ dopo gê wẹ jẹ nado wà ẹ, enẹ wẹ Visunnu Jiwheyẹwhe tọn.

Mí hia to afọ fọtọ̀ntọ lọ mẹ, dọ, “… nẹmunẹmu wẹ ojọmiọn Jiwheyẹwhe tọn, podọ núniná gbọn ojọmiọn dali, yèdọ gbọn omẹ dopo Jesu Klisti dali.” Yẹn jlo na dọ hlan mẹmẹsunnu he to devizọ́nwà hlan Jiwheyẹwhe lẹpo dọmọ, e to dandan mẹ nado dó osi na Ohó Jiwheyẹwhe tọn dopodopo, bo yise, bo sọ dọ Ẹ kẹdẹdilé yè wlán ẹn do.

Yẹn ko tọ́nwhẹnyì ofi susu bo ko dásà onú susu, dọ: Yẹwhe-atọ̀n-sẹ̀ntọ lẹ gbẹ́kọ owéfọ dopodopo go bo sọ dèkunnu na dopoyínyín Jiwheyẹwhe tọn. Owé Wiwé helẹ ma jẹ hẹ yé gba na linlẹn yetọn gbọnvo do Jiwheyẹwhe tọn go.

Ohógbè devo de sọ tin he yè ylọ, dọ: “Jesu-kẹdẹ-sẹ̀ntọ lẹ”; omẹ helẹ ma jlo na zán Owé Wiwé lẹpo gba, na yé nọ pọ́n dọ dopoyínyín Jiwheyẹwhe tọn, yín bibó bọ e ma ná ali Jiwheyẹwhe nado dó Ede hia gba. Ṣigba Jiwheyẹwhe nọ dó Ede hia dolé É jlo dó, do ogbẹ́ donu aweji kavi atọ̀n ji. É sọgan yín Núdátọ, É sọgan yín Ahọlu, É sọgan yín Whẹ̀datọ, É sọgan yín núdepope. É sọgan dó Ede hia di Otọ́ he tin to olọn mẹ, podọ to aigba ji to Ovi mẹ, podọ to mí mẹ gbọn Gbigbọ Wiwé dali, ṣigba É gbẹ́sọ to Jiwheyẹwhe dopolọ yín.

Owé Wiwé he dọhó do Oklunọ mítọn go lẹpo di gbẹtọ, yín onú titegbe de, na gbẹtọ wẹ mí, bọ Ewlọsu sọ lẹzùn gbẹtọ na míwlẹ tọn wutu. Oklunọ he tọ́njẹgbonu sọn dòdónu gọfla Jiwheyẹwhe tọn mẹ, yè dọ “Logos” he yín Ohó lọ; Jiwheyẹwhe he dọhó bo sọ wà ẹ, dọmọ: “Yè sọ lẹ́ Ohó lọ zùn agbasalan… mí pọ́n gigo etọn, gigo he di Ovi dètọ́n dopo akàn sọn Otọ́ de” (JOHANU 1:14).

Núvivẹ wẹ Owé Wiwé helẹ, yè ma sọ dègbè na mí nado gbẹ́kọ sọn yé go gba. Mì sọgan dindona dagbedagbe, yèdọ mì devizọ́nwàtọ lẹ, eyín mì sọgan mọ Owé Wiwé he ma sọgbe de whenuena mì to Biblu hia. Bé enẹ ko sọawúhia mì pọ́n? Mì yín nugbonọ. E ma sọgan jọ! Mì ma dóhùdo nado zé alọ mìtọn lẹ gba. Eyín mì mọ owéfọ mọtọnhunkọ lẹ to Biblu mẹ, mì biọ sọn Jiwheyẹwhe si nado dohia mì kọ̀ndopọ́ podọ nado dohia mì núhe wutu yè do wlán yé.

Na apájlẹ de, to Owé 1 TIMỌTI 2:5 tọn mẹ, yè wlán ẹn dọ, “Na Jiwheyẹwhe dopo wẹ tin, whẹgbọtọ dopo ga to Jiwheyẹwhe po gbẹtọ po ṣẹnṣẹn, dawe lọ, Jesu Klisti.” Yẹn ma to hójlawéma de hia gba, ṣigba Biblu wẹ yẹn to hihia, mọwẹ yè wlán ẹn dó to Owé 1 TIMỌTI 2:5 tọn mẹ, dọ, Oklunọ lẹzùn gbẹtọ.

Yẹn na hia whladopo dogọ́ to Owé KOLOSINU tọn mẹ, ṣigba jẹnukọn whẹ, mì gbọ mí ni hia Owé FILIPINU 2:7-8 tọn mẹ, “Ṣigba é klọ́n gigo etọn dai, é yí ojlẹmọ afànumẹ tọn de na ede, yè sọ basi i to apájlẹ gbẹtọ lẹ tọn mẹ: mimọ ẹn to apájlẹ gbẹtọ de tọn mẹ, é whiwhẹ ede, bo sọ lẹzùn tónusètọ kaka jẹ okú, yè dọ okú satin tọn.” É hodẹ̀ di gbẹtọ bo sọ vivavi dilé gbẹtọ nọ viavi dó, kẹdẹdi gbẹtọ É dọ, dọ: “Otọ́ klohú mi” (JOHANU 14:28). Kẹdẹdi gbẹtọ É zinzọnlin to aigba he ji. Ewọ wẹ “Ovi gbẹtọ tọn”, Ewọ yín “Yẹwhegán de”, enẹ wẹ Ohó he yè dọ gbọn Mọse dali, dọ: “Oklunọ lọ Jiwheyẹwhe towe na zé yẹwhegán de hlan we sọn gblagbla towe mẹ, sọn mẹmẹsunnu towe lẹ mẹ, jijlẹ do ogo é; ewọ wẹ mì na tuntóai hlan” (DEUTELONOMI 18:15-18).

To Owé OWALỌ 3:21-23 tọn mẹ, mí hia dọ, “Mẹhe olọn ma sọgan nọ ma yí kaka e nado jẹ ojlẹ ohẹngọ̀ onú popo tọn mẹ, he Jiwheyẹwhe ko dọ sọn onù yẹwhegán wiwé etọn lẹpo tọn mẹ sọn whenuena aihọn ko ṣẹ̀. Mọse dọ hlan otọ́ lẹ nugbonugbo, dọ, Oklunọ Jiwheyẹwhe mìtọn na zé yẹwhegán de tite hlan mì to mẹmẹsunnu mìtọn lẹ mẹ, di yẹn hunkọ; ewọ wẹ mì ni yise to onú he é na dọ hlan mì lẹpo mẹ. E nasọ wá jọ, ayiha depope he ma yí yẹwhegán lọ sè, wẹ yè na súdo sọn gbẹtọ lẹ mẹ.”

Jesu dóna yín yẹwhegán podọ di Ovi gbẹtọ tọn, É yín gbẹtọ bo sọ yín yẹwhegán enẹwutu wẹ e do yín winwlán to Owé JOHANU 5:19-20 tọn mẹ: dọ, “Enẹwutu Jesu gblọn, bo dọ hlan yé, dọmọ, nugbo,nugbo, wẹ yẹn dọ hlan mì,Ovi ma sọgan wà núde ededenu, adavo onú he É mọ Otọ́ wà: na núdepope he É wà, ehelẹ wẹ Ovi to wiwà mọ ga. Na Otọ́ yíwánna Ovi, bo sọ yí onú he Ewlọsu to wiwà lẹpo hia ẹ”.

Yẹwhegán lẹ wẹ yè ylọ jẹnukọn dọ, “númọtọ” na yé nọ mọ númimọ lẹ kẹdẹdilé yè dohia hlan yé do. Mọdopolọ wẹ hlan Oklunọ mítọn Jesu Klisti. Kẹdẹdi “Ovi gbẹtọ tọn”, É yín yẹwhegán de bọ gbẹtọ lẹ jẹagọdo devizọ́n dọdai Etọn tọn. É yọ́n linlẹn gbẹtọ lẹ tọn, É yọ́n gbẹtọ alọpa he yé yín, bo yọ́n oyín yetọn lẹ podọ ofi he yé jọ̀sọn. Whenuena Pita wá Ede, Jesu dọ hlan ẹn, dọ, “Hiẹ wẹ Simọno, ovisunnu Jona tọn…” Whenuena Filipi po Natanaẹli po wá Ede, É dọ hlan Natanaẹli dọmọ: “… pọ́n Islaẹlinu nugbo, mẹhe mẹ oblu ma tin te! Natanaẹli sọ dọ hlan ẹn, dọ, Fie hiẹ yọ́n mi sọn? Jesu gblọn bo dọ hlan ẹ dọ, whẹpo Filipi ylọ we, whenuena hiẹ tin to ovotin glọ, yẹn ko mọ we” (JOHANU 1:47-48). Yẹwhegán de wẹ É yín.

É sọgan dọ hlan nawe nẹ to dòtọ kọ̀n dọ, “Na hiẹ ko tindo asú atọ́n dai podọ mẹhe hiẹ tindo dinvie ma yín asú towe gba: nugbo wẹ ehe hiẹ dọ. Nawe lọ sọ dọ hlan ẹn, dọ, Mẹdaho, yẹn mọ dọ yẹwhegán de wẹ hiẹ. Otọ́ mítọn lẹ sẹ̀n to osó he ji, bọ mìwlẹ dọmọ, Jelusalẹm wẹ otẹn he jẹ gbẹtọ lẹ na nọ sẹ̀n te… Nawe lọ sọ dọ hlan ẹn, dọ, yẹn yọ́nẹn dọ Messia ja, Mẹhe yè nọ ylọ Klisti: whenuena é wá, é na lá onú lẹpo hlan mí. Jesu sọ dọ hlan ẹn, dọ, Yẹn Mẹhe to hódọ hẹ we wẹ ewọ lọ”. Nawe lọ dowezun yì otòdaho lọ mẹ, bo dọ onú he jọ lẹpo hlan gbẹtọ lẹ, dọmọ: “Mí wá pọ́n dawe de, Mẹhe dọ onú he yẹn ko nọ wà lẹpo na mi. Bé Klisti lọ ma die?” (JOHANU 4:18-29).

É sọgan dọ hlan núplọ́ntọ awelẹ, dọ, “Mì yì gbeta he pànnukọn mí mẹ, to afọdodoponẹji lé mì to bibọ e mẹ, mì na mọ osọ́vu de he yè sìn, ehe ji mẹde ma hẹ gbèdé; mì tún in, bo dọ̀n ẹn wá. Eyín mẹde dọ hlan mì, dọ, etẹwutu wẹ mì to ehe wà? Mì dọ, dọmọ, Oklunọ do onú na yì i do wà; afọdodoponẹji é sọ do yé hlan ofi” (MALKU 11:2-3). Mọwẹ e jọ dó. É sọgan dọ hlan núplọ́ntọ Etọn awelẹ dọ, “… Mì yì otòdaho mẹ, dawe he hẹn ozẹ́n osìn tọn de na pé mì; mì hodo é. Fidepope é biọ, na mì ni dọ hlan owhénọ lọ, dọ, mẹplọ́ntọ dọmọ, fie wẹ abò nùdúdú tọn lọ te, fie yẹn na dù jùwáyi te po núplọ́ntọ ṣie lẹ po?” (MALKU 14:13-14).

Yẹwhegán de wẹ É yín, ṣigba azọ́n dọdai Etọn tọn dá kinklán gbigbọ lẹ tọn dai. Mọdopolọ wẹ na devizọ́n nọvisunnu Branham tọn. Agùn daho susu plidopọ́, awuji gbẹtọ mliyọn susu whenuena yé mọ ohia po azọ́n jawu susu he jọ lẹ po. Yé ma sè ogbè nọvisunnu Branham tọn kẹdẹ gba, ṣigba yé mọ azọ́n dabla daho Jiwheyẹwhe tọn tọn.

Yẹn lọsu na dê sọawúhia to gblagbla gbẹtọ susu lẹ tọn to opli he nọvisunnu Branham basi to otò Europia tọn mẹ, podọ to otò Amẹlika tọn mẹ. Yẹn mọ núhe jọ to devizọ́nwiwà nọvisunnu Branham tọn tọn mẹ, kẹdẹdilé e jọ dó to devizọ́nwiwà Jesu Klisti Lọsu tọn mẹ.

Whenuena angẹli Oklunọ tọn wá nọvisunnu Branham de to azán ṣinawetọ owhèsùn atọ́ntọ tọn mẹ, to owhè 1946 tọn mẹ, to ogàn widopo zánmẹ tọn mẹ, ohọ̀ lọ blébú gọ́na hinhọ́n, podọ nọvisunnu Branham mọ angẹli lọ sọawúhia gbaungba to agbasalan gbẹtọ tọn de mẹ. É jlẹ awúsọhia etọn, é jlẹ gadidi etọn po pinpẹn etọn po dọ, é ma doafọpa, mọ é ma sọ tindo otán gba. É jlẹ ninọ̀mẹ etọn hézéhézé. Angẹli lọ dọ hlan nọvisunnu Branham, dọ: “Yè do mi hlan dewe sọn Jiwheyẹwhe Gánhunupo de nado zọ́n azọ́n we.” Angẹli he wá sọn Jiwheyẹwhe de na nọvisunnu Branham tadena núhe na jọ to devizọ́nwiwà etọn mẹ, bo sọ dlẹn alọ do Owé Wiwé lẹ sọn Owé JOHANU 1 tọn mẹ dogbọn Natanaẹli po Pita po tọn dali. Podọ sọn Owé JOHANU 4 tọn mẹ dogbọn yọnnu Samaliatọ tọn dali to dòtọ̀ kọ̀n. Angẹli lọ zé na nọvisunnu Branham dòdónu Biblu tọn, na ewọ nido tindo kàndeji. Whenuena Jiwheyẹwhe dọhó, to whenẹnu núhe É dopagbè etọn nido yín dòdónu Ohó Etọn tọn.

Gbẹtọ he to didọ, dọ, “Oklunọ dọhó hlan mi…”, podọ eyín mì dotó ohó he omẹ lọ dọ, whenẹnu wẹ mì na mọdona dọ linlẹn etọn kẹdẹ wẹ é dọ po ayiha etọn po. Ṣigba devizọ́nwàtọ nugbo Jiwheyẹwhe tọn lẹ nọ kẹalọyí azọ́n he yè zọ́n yé dolé e te to whelẹponu.

Whenuena Jiwheyẹwhe dọ hlan Noe, É dọ núhe jẹ dọ é ni wà hlan ẹn dolé é jẹ dó, Jiwheyẹwhe ná ẹn ninọ̀mẹ lẹpo. É dọhó titegbe bo sọ yín winwlán dọ: Mọwẹ, Noa sọ basi do; kẹdẹdi enẹ he Jiwheyẹwhe ko degbèna ẹn lẹpo; mọwẹ é basi do. (GENẸSISI 6:22).

Whenuena Jiwheyẹwhe dọhó hlan Mọse, bọ mí hia to Owé HEBLU 8:5 tọn mẹ dọ, Mọse wànú lẹpo kẹdẹdilé yè dohia ẹ sọn osó lọ ji do.

Whenuena Johanu dèkunnu, é dọmọ: “… ṣigba mẹhe do mi hlan nado yí osìn do baptizi, ewọ wẹ dọ hlan mi, dọ, Ota mẹhe tọn ji hiẹ mọ, bọ Gbigbọ jẹ do, bọ é nọte to é ji, ewọ lọ wẹ…” (JOHANU 1:33).

Omẹ Jiwheyẹwhe tọn lẹpo nọ mọ devizọ́n de yí sọn Jiwheyẹwhe de to whelẹponu, bo sọ yọ́n núhe yé dóna wà. Elija ma wà núhe Mọse wà gba; omẹ dopodopo tindo devizọ́n etọn. Yè wlán dogbọn Elija tọn dali to Owé 1 AHỌLU 18 tọn mẹ, dọ, ewlọsu wà onú lẹpo kẹdẹdilé Ohó Oklunọ tọn dọ dó.

Yẹn jlo nado dọhó titegbe do devizọ́n nọvisunnu Branham tọn ji, na e tindo kànṣiṣa po titò whlẹngan Jiwheyẹwhe tọn tọn po. Nọvisunnu Branham ma yín wẹndagbelátọ kẹdẹ gba, na wẹndagbelátọ susu wẹ tin; é ma yín Biblu plọ́nmẹtọ kẹdẹ gba, na Biblu plọ́nmẹtọ susu wẹ tin ga; e sọgan yín dọ, yẹwhegán susu wẹ tin, yẹn ma yọ́nẹn sọha yetọn gba. Enẹwutu wẹ Jiwheyẹwhe do zé “apọsteli lẹ, po yẹwhegán lẹ po, po wẹndagbelátọ lẹ po, po lẹngbọtọ lẹ po, po mẹplọ́ntọ lẹpo po” do Agùn Etọn mẹ. Ṣigba nọvisunnu Branham ma tindo devizọ́n yẹwhegán tọn kẹdẹ to agùn dopo ji gba, na yè wlán dogbọn yẹwhegán agùn dopodopo tọn lẹ tọn dali, dọ, omẹ awe kavi atọ̀n dóna nọ dọhó eyín yè do núde hia hlan omẹ devo he sinai to finẹ dali…

E pọnte na mí nado hia, na mí nido mọdona lé yè wlán ẹn dó to Owé 1 KỌLINTINU 14:29-30 tọn mẹ, dọ: “Mì gbọ yẹwhegán awe kavi atọ̀n ni dọhó, na mẹdevo lẹ ni dáwhẹ̀. Eyín yè do onú de hia hlan omẹ devo he sinai to finẹ dali, mì gbọ omẹ tintan ni dó onù etọn abọẹ.” Ehe ma kàn ohódọdai de tọn gba, ehe wẹ yẹwhegán Alẹ̀nù Yọ́yọ́ mẹ tọn he gbọnvo do yẹwhegán Alẹ̀nù Hóhó mẹ tọn lẹ go, dọ: Yẹwhegán Alẹ̀nù Hóhó mẹ tọn lẹ nọ dọ núhe na wà jọ lẹ jẹnukọn. Ṣigba yẹwhegán Alẹ̀nù Yọ́yọ́ mẹ tọn lẹ nọ zé Ohó dọdai tọn lẹ lọ do ṣiṣẹ̀ yetọn lẹ mẹ.

Eyín yè do núde hia hlan yẹwhegán de nado dọ ẹ, bọ é ma pégo nado dọ nugbo ohó lọ tọn, bé whenẹnu e sọgan jọ bọ onú dopolọ na yín didohia hlan omẹ devo he na dọ ẹ nugbo bo sọ fõ tuklan nẹ. E ma yín ohóta yọ́yọ́ de kavi dọdai de gba, ṣigba nado gọ́na ẹn gbọn núdohiamẹ Jiwheyẹwhe tọn dali.

Enẹwutu mí ma tin to ofi nado dọhó do núniná Gbigbọ tọn lẹ ji gba. Onú susu sọgan yín didọ to dotẹn enẹ tọn mẹ, ṣigba ohóta mítọn vivẹ lọ wẹ Jiwheyẹwheyínyín, bọ mí ko sọ dọhó do ohógó he yín “Logos” ji. Mí mọdona? yín e tlẹ yín dọ mí ma sọgan ná tunmẹ Etọn, dọ Jiwheyẹwhe madopòdo tin di Gbigbọ to gọfla dòdónu Etọn tọn mẹ. Podọ to whẹ́whẹ́whenu, É tọ́njẹgbonu sọn gọfla dòdónu Etọn tọn mẹ, e ma yín to madopòdo mẹ gba, ṣigba to whẹ́whẹ́whenu. Enẹwutu wẹ yè do wlán ẹn, dọ: “To whẹ́whẹ́whenu wẹ Ohó ko tin…”, e ma yín “to madopòdo mẹ wẹ Ohó lọ ko tin te” gba, ṣigba to whẹ́whẹ́whenu wẹ Ohó lọ ko tin.

Whenuena Jiwheyẹwhe ṣẹ̀ azọ́nwà, yè dọ whenuena É sọawúhia to agbasalan gbaungba he nukun nọ mọ tọn de mẹ, whenuena É ylọ núdidá lẹ wá ayi mẹ wẹ dòdónu nugbo he lọ ṣẹ̀ sọn. Yè wlán ẹn to Owé dọdai MIKA 5:2 tọn mẹ. Yẹn yise dọ, yè wlán ẹn hézéhézé na wuntuntun mìtọn. Yè wlán dogbọn Bẹtlehẹm po Oklunọ mítọn po tọn dali, dọ: “Ṣigba hiẹ, Bẹtlehẹm Eflata, he yín pẹvi nado tin to whédo Juda tọn lẹ ṣẹnṣẹn, hiẹ mẹ wẹ mẹde na jẹgbonu sọn wá jẹ dê he tin nado yín ogán to Islaẹli mẹ; gbonujẹ yì mẹhe tọn lẹ tin sọn hóhó tọn mẹ, sọn azán hóhótọ lẹ mẹ.” Ewọ, yè dọ, Yahweh, mẹhe tin to madopòdo mẹ, Jiwheyẹwhe he nukun ma nọ mọ dó Ede hia to ninọ̀mẹ gbaungba tọn he nukun mọ de mẹ.

Yẹn tindo Biblu daho de to whégbe, Ehe yè tunmẹ nugbo sọn ogbè Heblu tọn mẹ. E sọgan yín nugbo na yẹn dindona owéfọ delẹ he tunmẹ yetọn sọgbè titegbe. Ṣigba to apà Biblu lọ tọn ji, ohógbè de tin to finẹ he yè tunmẹ, dọ, “Yahshua – Ovi Yahweh tọn”. Ohógbè nẹ lọ jẹagọdo Owé Wiwé lẹpo. Yahshua wẹ yín Yahweh. Ewọ lọ wẹ Oklunọ, Ewọ lọ wẹ Logos he yín Ohó lọ. Elohim wẹ Jiwheyẹwhe, Yahweh wẹ Oklunọ, podọ Oklunọ lọ wẹ awúsọhia gbaungba Jiwheyẹwhe tọn, kẹdẹdilé Ovi lọ yín awúsọhia gbaungba Otọ́ tọn dó.

Dogbọn Oyín lọ tọn dali, yẹn ko dọ na mì jẹnukọn dọ, to Alẹ̀nù Hóhó mẹ Jiwheyẹwhe ma yín Otọ́ gba. To Alẹ̀nù Hóhó mẹ Jiwheyẹwhe yín Jiwheyẹwhe Oklunọ, Ewọ lọ wẹ Jiwheyẹwhe Islaẹli tọn.

To Alẹ̀nù hóhó mẹ, yẹwhegán de matin he ko hodẹ̀ dọmọ, “Otọ́ mítọn he tin to olọn mẹ” gba kaka jẹ whenuena e yín hinhẹn ṣẹ̀, dọ, “… Hiẹ wẹ Ovi ṣie; egbé wẹ yẹn dè we tọ́n”. To asiko nẹ mẹ wẹ e yín hinhẹn ṣẹ̀ dọ, “Yẹn na yín Otọ́ etọn, podọ ewọ na yín Ovisunnu ṣie”, “Yẹn na yí ewọ do basi oviplọ́nji ṣie”. Ehe wẹ bibẹ́nu to aliho he Jiwheyẹwhe ṣẹ̀ whẹndo yọ́yọ́ de tọn. Ewọ, Oklunọ lọ kẹdẹdi Oviplọ́nji.

Dinvie nado din Oyín lọ, yẹn jlo na hia owéfọ devo de to Owé EKSỌDUSI 6:2 tọn mẹ, dọ, “Jiwheyẹwhe sọ dọhó hlan Mọse, bo dọ hlan ẹn, dọmọ, Yẹn Jehova (Yahweh) wẹ”. (“Yahweh” tin to ninọ̀mẹ Etọn nugbonọ lọ to ofi”). “Yẹn sọawúhia hlan Ablaham, hlan Isaki, podọ hlan Jakọbu, di Jiwheyẹwhe Gánhunupo, ṣigba gbọn oyín ṣie Jehova (Jiwheyẹwhe Oklunọ) dali wẹ yẹn ma yín mẹyinyọ́nẹn hlan yé gba” (EKSỌDUSI 6:3). To tunmẹ ogbè Germany tọn tọn mẹ, Yahweh yín winwlán to apáwhé odò tọn to Biblu lọ mẹ. Jiwheyẹwhe tindo Oyín de, Oyín nẹ mẹ É sọawúhia te to whenuena Islaẹli yín hinhẹnjẹ mẹdekànnu. “Yahweh” wẹ yín Oyín alẹ̀nùnù tọn to Alẹ̀nù Hóhó mẹ, ṣigba mí ma sọgan dọ, dọ, Oyín Otọ́ tọn wẹ gba. Mí sọgan dọ poun dọ, Oyín alẹ̀nùnù tọn he mẹ Jiwheyẹwhe hẹn yé ovi Islaẹli tọn lẹ jẹmẹdekànnu to whenuena É flí yé gọ̀ sọn alọ Egyptinu lẹ tọn mẹ.

Dogbọn whlẹngan mítọn dali to Alẹ̀nù Yọ́yọ́ mẹ tọn wutu wẹ yè wlán ẹn dọ, “… Podọ hiẹ nasọ ylọ oyín etọn dọ, Jesu (Yahshua), na ewọ wẹ na whlẹn omẹ etọn lẹ gán sọn ylando yetọn lẹ mẹ” (MATIU 1:21). To ohógbè Glẹki tọn mẹ, “Yahshua” yín Oyín alẹ̀nùnù Oklunọ Jiwheyẹwhe tọn to Alẹ̀nù Yọ́yọ́ mẹ. Enẹwutu Oyín Otọ́ lọ tọn wẹ Oyín Ovi lọ tọn.

Yẹn jlo nado hia owéfọ delẹ na mì po sisi de po, to Alẹ̀nù Yọ́yọ́ mẹ to Owé JOHANU 12:28 tọn mẹ, mí hia dọ, “Otọ́, pagigona oyín towe! Enẹwutu ogbè de sọn olọn mẹ wá, dọmọ, yẹn ko pagigona ẹn, bo nasọ vọ́ gigopana ẹn”.

To Owé HEBLU 1:4 tọn mẹ, mí hia dọ, “Sọlé yè hẹn ẹn pọ́nte hú angẹli lẹ dó dilé é ko mọ oyín he gbọnvo de yí hú yé”. Ewọ dùgú Oyín he tọn.

Di apájlẹ de, oyín otọ́ ṣie tọn wẹ Frank, oyín otọ́gbo ṣie lẹ tọn wẹ Frank, bọ yẹn sọ dùgú oyín nẹ tọn. Ovi lọ dùgú Oyín lọ tọn.

Eyín ṣiṣadopọ́ po whlẹngan po: “Yahshua”, “Yahweh”, “Whlẹngantọ”. Yahweh Alẹ̀nù Hóhó mẹ tọn lẹzùn Whlẹngantọ Alẹ̀nù Yọ́yọ́ mẹ tọn. “Jesu dopolọ to osọ́, egbé, mọwẹ podọ kakadoi” (HEBLU 13:8). “Oklunọ dọmọ, Yẹn wẹ Alfa, Yẹn wẹ Omẹga, Odódó, Opòdo, bo ko tin, bo ko sọ ja, Gánhunupo” (OSỌHIA 1:8).

Ohóta he yín didọ to Owé JOHANU 17 tọn mẹ. Mì gbọ mí ni hia sọn Owé JOHANU 17:6 tọn mẹ, “Yẹn ko do oyín towe hia omẹ he hiẹ na mi sọn aihọn mẹ lẹ..”. Oyín tẹwẹ É dohia? Oyín “Jesu” tọn. Ma jẹagọdo Oyín Jesu tọn blo to whenuena É ma yín didọ to ogbè Heblu tọn mẹ dọ Yahshua wutu. Mì tindo ogbè susu ṣigba ogbè Heblu tọn whẹ́whẹ́ mẹ wẹ yè wlán ẹn do, podọ to ogbè Aramaic tọn mẹ, to godo wẹ yè wá wlán ẹn do ogbè Glẹki tọn mẹ, ṣigba mí yọ́n tunmẹ Oyín lọ tọn, Jiwheyẹwhe sọ hẹn Oyín lọ wá ṣiṣẹ̀ mẹ, whenẹnu wẹ É yín yiylọ to ogbè Glẹki tọn mẹ. Jiwheyẹwhe yọ́n Omẹ lọ podọ Mẹhe hó mí to didọ. Mì jale! Mì nọ̀ sisi mẹ na mẹdepope ni ma dọ̀n tukla wá blo. Na to whedelẹnu, mí nọ hẹn tukla he mí ma sọgan pego lẹ wá.

Yẹn dọhó nọvisunnu Branham tọn taidi pọ́ndego de. É hodẹ̀ to Oyín Jesu Klisti Nazalẹti tọn mẹ bọ oṣiọ lẹ nọ fọ́n do ogbẹ̀, nukuntọnnọ lẹ nọ mọ nukun bọ sẹkunọ lẹ nọ zinzọnlin. Jiwheyẹwhe hẹn devizọ́n nọvisunnu Branham tọn wá ṣiṣẹ̀ mẹ. Mí ma sọgan basi mayise dogbọn nújijọ nẹ lẹ tọn dali gba. Yẹn tindo Biblu German tọn bo sọ nọ dọyẹwhehó sọn Biblu German tọn mẹ, hiẹ lọsu tindo Biblu towe to ogbè towe mẹ, bo sọ nọ dọyẹwhehó sọn É mẹ. Mẹdopodopo nọ dọyẹwhehó sọn Biblu yetọn lẹ mẹ na Jiwheyẹwhe yọ́n ogbè lẹpo wutu. Na apájlẹ de, mí nọ ylọ otò mítọn dọ, Deutschland bọ mìwlẹ nọ ylọ ẹ dọ, Germany, ṣigba mì yọ́n otò he hó mì to didọ bọ míwlẹ lọsu yọ́n otò he hó mí to didọ. Mẹdelẹ nọ dọ England, mẹdevo lẹ sọ nọ dọ Britain, onú dopolọ wẹ. Enẹwutu mì jale, mì dike enẹ hẹn tukla wá na mì blo! Ṣigba mì nọ oglọ na mẹpinplán Gbigbọ Wiwé tọn, whenẹnu wẹ Jiwheyẹwhe na dona mì.

Mì gbọ mí ni gọ̀yì Owé JOHANU 17:11 tọn mẹ, “Dinvie yẹn ma sọ tin to aihọn mẹ ba, ṣigba ehelẹ tin to aihọn mẹ, yẹn sọ ja de we. Otọ́ wiwé, whlá yé he hiẹ na mi lẹ to oyín dewe tọn mẹ…”. Afọ wiawetọ (12) lọ yín hinhẹn ṣẹ̀, dọ, “Whenuena yẹn tin to yé de, yẹn whlá yé he hiẹ na mi to oyín towe mẹ: yẹn sọ họ́ yé, dopo sọn yé mẹ ma dọ̀n…”. Afọ kòatọ́n-nukun-dopotọ (26) lọ, “Yẹn sọ hẹn oyín towe zùn yinyọ́nẹn hlan yé…”. Oyín tẹwẹ É to didọ?

Oyín dopo gê wẹ yín niná hlan gbẹtọ gbọn Jiwheyẹwhe dali, Ehe dali yé sọgan gbọn do whlẹn mgan. Mí tindo kàndeji godo tọn dọ, Oyín Otọ́ lọ tọn po Ovi lọ tọn po dopolọ wẹ. To Owé MATIU 28:19 tọn mẹ, fie Oklunọ dọ te, dọmọ, “… Bo sọ nọ baptizi yé do oyín Otọ́ tọn, po Ovi tọn po, po Gbigbọ Wiwé tọn po mẹ”. Omẹ lẹpo wẹ yè baptizi to Oyín Oklunọ Jesu tọn mẹ, enẹ wẹ ogblọndo Jiwheyẹwhe tọn.

Mì jale, mì ma dindona gbọn oyọ́nẹn wémapinplọ́n tọn dali blo! Ṣigba mì gbọ na Gbigbọ Wiwé ni do É hia mì. Paul wlánwé hlan Kọlintinu lẹ, dọmọ, “Ṣigba gbẹtọ jọwamọ ma yí onú Gbigbọ Jiwheyẹwhe tọn tọn lẹ gba…” (1 KỌLINTINU 2:14). Mí sọgan dọhó susu dogọ́, ojlẹ mítọn ko yì. Bé mì mọdona ohóta Jiwheyẹwheyínyín tọn hézéhézé? Niṣẹ. Na Jiwheyẹwhe ni do É hia hlan yé mẹhe ma ko mọdona to dinvie lẹpo! Ṣigba mì jale, mì ma zán mayise de dogbọn Ewọ tọn dali blo, mọ mì ma sọ dọ̀nú do É ji blo! na yé mẹhe nọ dọ̀nnú lẹ ma ko mọ núdohiamẹ depope yí sọn Jiwheyẹwhe de gba. Mẹhe mọ núdohiamẹ sọn Jiwheyẹwhe de, nọ whlá ẹ do ayiha etọn mẹ, na adọkun vivẹ de wẹ Jiwheyẹwhe ko ná ẹn wutu. Mẹdepope he gbẹ́sọ to linlẹn nado dọ̀nnú, ma sọgbe hẹ Jiwheyẹwhe gba. Omẹ delẹ nọ yí ohó jẹagọ delẹ na Ohó Jiwheyẹwhe tọn. Podọ omẹ delẹ sọ nọ kànbiọ dọ: “Whetẹnu wẹ Jesu lẹzùn Logos do?” … Ohókànbiọ nẹlẹ ylan bo ma sọ tọ́nsọn Gbigbọ Jiwheyẹwhe tọn mẹ. Satan wẹ to azọ́nwà to finẹ. Na míwlẹ tọn, mí nọ dọ núhe Biblu dọ, “To whẹ́whẹ́nu Ohó ko tin (podọ ehe lọ wẹ Logos), Ohó lọ ko tin po Jiwheyẹwhe po”, whenẹnu wẹ míwlẹ nọ dọ, “Niṣẹ”, podọ “Niṣẹ” dogọ́.

Mí ma nọ dómayise dogbọn ohóta lọ tọn dali, mọ mí ma nọ din nado dèpò sọn Ohó lọ mẹ gba, ṣigba mí nọ dọ kẹdẹdilé Paul dọ dó, dọ: “Podọ matin núdindọ̀n, daho wẹ núdabla jijọ-di-Jiwheyẹwhe tọn: yè yí hia to agbasa mẹ, bo sọ sùwhẹ̀ nẹ́ to Gbigbọ mẹ…” (1 TIMỌTI 3:16).

Mì omẹ pó mọdona Owé Wiwé he. Fie Biblu ma dọhó te, yẹn lọsu ma nọ dọhó gba. Mì nọte to Owé Wiwé lẹ mẹ, mì sọ tọ́nsọn É mẹ blo! Whenẹnu wẹ mì na hẹn kọ̀ndopọ́ go to Gbigbọ mẹ. Eyín mì ma hodo ehe, mì na tọ́nsọn ohùkàn Owé Wiwé tọn ji, podọ whenẹnu wẹ domọnanújẹagọ lẹ na fọ́n bọdo kinklán lẹ go, po onú susu devodevo lẹ po.

Mẹyinwanna nọvisunnu he nọ dọyẹwhehó Jiwheyẹwhe tọn lẹ, yẹn biọ mì to Oyín Oklunọ Jesu tọn mẹ, dọ mì ni hẹn kọ̀ndopọ́ go to Gbigbọ mẹ, bo nọte to Ohó Jiwheyẹwhe tọn mẹ, bo ma yì aga hú kunnudidè Owé Wiwé lẹ tọn blo, bo ma sọ lẹn, dọ: “Yẹn mọ núdohiamẹ gbọnvo de” blo! Mì yise dọ, Jiwheyẹwhe ko ná núdohiamẹ dopolọ omẹ lẹpo. Podọ yín e yín núdohiamẹ de sọn Jiwheyẹwhe de, bé to whenẹnu e ko tin to Biblu mẹ. Eyín núdohiamẹ lọ ma tin to Biblu mẹ, mì dóna wọnji sọn e go. Eyín mì sọgan wọnji núdohiamẹ mọtọnhunkọ go, e na yọ́n. Bé mì mọdona?

Yẹn ma to ofi nado plọ́n mì gba, ṣigba yẹn tindo jlọjẹ de sọn Jiwheyẹwhe de. Yẹn ma to ofi na gbọjẹzán de tọn wutu gba, yẹn to ofi na Ohó Jiwheyẹwhe tọn wutu. Mì hẹn enẹ he yè dọ hlan mì go gigli! Mì dike kinklán de tin to mì ṣẹnṣẹn blo! Mì jo mìde hlan kinklán lẹ blo, na yé ma yín onú dagbe de gba!

Yẹn sọ vọ́ dọ, mì to nukọnyì to whenuena Owé Wiwé to nukọnyì, podọ fie Biblu nọte te, finẹ wẹ mìwlọsu na nọte te ga. Whenẹnu wẹ onú lẹpo na tin to gbesisọ mẹ to agùn dopodopo mẹ, podọ na nọvisunnu devizọ́nwàtọ dopodopo nido tindo ayiha dopo po alindọn dopo po.

Yẹn to vivẹ mì dọ, nọvisunnu de zé ede daga do nọvisunnu he pò lẹ ji blo. Yẹn ma yín ogán na mẹhe pò lẹ gba, ṣigba devizọ́n vòvo wẹ mí tindo, na Oklunọ dopo wẹ Ota mí omẹ pó tọn, yedọ Jesu Klisti. Nọvisunnu de ma yín ogán do nọvisunnu de ji gba ṣigba Oklunọ wẹ yín Ogán mí omẹ pó tọn. Podọ É ná devizọ́n vòvo mí nado penukun Agùn lọ go to whelẹponu to titò mẹ. Na É ma ná devizọ́n mí nado hẹn kinklán wá gba. Núhe tọ́n sọn Jiwheyẹwhe de wá míde nọ hẹn mí gọ̀do Jiwheyẹwhe de. Enẹwutu wẹ yè do wlán ẹn dọ, “Mọkẹdẹ wẹ Ohó ṣie he tọ́n sọn onù ṣie na te: é ma na lẹ́gọ̀wá dê agbá, ṣigba é na dotana onú he yẹn jlo, é na wàdagbe to onú he mẹ yẹn do é hlan te” (ISAIA 55:11).

Nọvisunnu lẹ, mì hẹn e go gigli bo sọ yọ́nẹn dọ whenu lọ ko wà, na kọlilẹwá Oklunọ tọn ko sẹpọ́, podọ mí dóna din whenu nugbo nado hẹn Ohó Jiwheyẹwhe tọn wá na nọvisunnu mítọn lẹ. Bé mì mọdona ehe hézéhézé?

Dinvie, ohókànbiọ titegbe de tin dogbọn osẹ̀ kande-gbàn Daniẹli tọn dali. E yín domọna hézéhézé, ṣigba nọvisunnu devo lẹ tin he ma mọdona hézéhézé kavi hia yé jẹ gba.

Bé yẹn ni dọ ohó de hlan mì? Osẹ̀ kande-gbàn Daniẹli tọn ma tindo núde na wà po Agùn Alẹ̀nù Yọ́yọ́ tọn po gba. Ṣigba yé má ẹn do donu atọ̀n, podọ enẹ lọ tin hlan omẹ Isalẹli tọn lẹ.

Yè dọ hlan yẹwhegán Daniẹli dọ, “Yẹn na dohia we núhe na jọ do omẹ towe lẹ go, podọ do otò towe wiwé lọ go”. E ma yín Kosi lẹ gba, ṣigba omẹ Islaẹli tọn lẹ wẹ. Onú titegbe de wẹ ehe eyín mí mọdona, e nasọ gọalọna mí, to whenẹnu mí sọgan hia ohó he lọ jẹ hézéhézé. Mí na hia sọn Biblu mẹ nado dindona Ohó he Jiwheyẹwhe dọ.

Yẹn na hia Owé DANIẸLI 9:24 tọn, na mì tuntóai hlan onú he yè wlán to ofi, “Osẹ̀ kande-gbàn wẹ yé dogbèaina to omẹ towe lẹ ji podọ to tòdaho towe ji…” Niṣẹ! “… Omẹ towe lẹ podọ tòdaho towe wiwé lọ…” E ma yín otò Germany tọn, kavi Romania, kavi Bucharest tọn, kavi New York tọn gba, ṣigba “omẹ towe lẹ, Daniẹli, otòdaho towe wiwé lọ, Daniẹli”.

Whenuena mì to Biblu hia, e to dandan mẹ dọ mì ma nado hia Ẹ taidi ohójlawéma lẹ gba. Mí dóna mọdona jẹnukọn núhe É to didọ, podọ mẹhe É to hódọ hlan, na mí nido mọ núdohiamẹ, bo na sọ zé É do titò Jiwheyẹwhe tọn mẹ dagbedagbe. To ofi, azọ́n lọ tin to donu ṣidopo ji bo sọ tin to kọ̀ndopọ́ mẹ hẹ omẹ Islaẹli tọn lẹ.

Mì sọgan hia na mìde eyín e pé ṣidopo lọ kavi lala. Enẹwutu, mì gbọ mí ni vọ́ gọ Owé DANIẸLI 9:24 tọn lọ hia: “Osẹ̀ kande-gbàn wẹ yé dogbèaina to omẹ towe lẹ ji podọ to tòdaho towe ji…”, tintan wẹ yín dọ, “Nado hẹn ylando lẹ jẹ opòdo de”; awetọ wẹ yín dọ, “Nado klọ oylanwà lọ sẹ̀”; atọ̀ntọ wẹ yín dọ, “Nado dọwhẹ̀gbọ na núṣiwà”; enẹtọ lọ wẹ, “Podọ nado hẹn dódó madopòdo lọ wá họ̀mẹ, podọ nado yí hiadonú do tlẹ númimọ po yẹwhegán po, podọ nado sámìsisána otẹn madopòdo de”.